SIBU: Konvensyen Khas Parti Pesaka Bumiputera Bersatu (PBB) 2026 disema baka pengawa nandu pelajar sebedau timpuh napi peresa sekula dipejalai.
Premier Sarawak, Datuk Patinggi Tan Sri Abang Johari Tun Openg madah, gempuru nya nyadi peluang ngagai parti berati ke pemujur ti udah dijapai ba timpuh lima taun ti udah.
“Konvensyen tu ukai semina program biasa parti aja tang nyadi pelasar ngagai bala kaban berati ke baru pemujur ti udah, ngenegapka agi pemereti ati sida senentang tunga kuing parti sereta nyikap diri napi pengawa bepilih ti deka datai.
“Nya baka nembiak ti belajar ke baru subjek sida sebedau duduk napi peresa sekula, kitai mega patut nyikap diri.
“Kitai mansik baru utai ti udah digaga enggau manah, ngingatka pelajar ti engka udah enda ingat agi sereta nentuka kitai udah besikap awak ulih bulih pemutus peresa ti manah.
“Nya pekara ti digaga kitai sehari tu. Kitai berati ke baru nama utai ti udah dijapai kitai ungkup Sarawak ba timpuh lima taun ti udah,” ku iya.
Abang Johari bejaku munyi nya rambau bejadi Konvensyen Khas PBB Zon Tengah ti diatur ba Stadium Betutup Sibu kemari.
Ku iya, PBB nyadi tulang belakang Gempung Parti Sarawak (GPS) udah nngesan tanggungpengawa nyadi tuai ti meri penemu enggau chara baru ti udah nyungkak pemansang nengeri tu nengah kerejasama rat enggau komponen parti dalam gempung nya.
“Alhamdulillah, PBB nyadi tulang belakang GPS. PBB udah nerang ke chara baru dikena ngemansang Sarawak enggau kerejasama parti komponen kitai. Tang penemu nya dipun bala tuai dalam PBB,” ku iya.
Iya nyemetak madah, konvensyen nya mega nyadi latih dikena nyendia diri, ke alai kaban parti meseti sedia napi tanya ari rayat enggau saut ti nyemetak sereta ulih ngasuh ati rayat pechaya.
“Kitai patut meresa diri empu. Kitai patut nyikap diri enggau tanya sereta sedia enggau saut ti betul,” ku iya.
Tandu iya, konvensyen nya mega meri peluang ngagai parti berundingka pemujur sida seraya ngelanggur pejalai nuju taun 2030.
“Kitai nyendia diri nengah chara mansik baru utai ti udah dijapai sereta mansang ngagai utai ti bisi ba mua kitai nyentuk taun 2030. Langgur kitai udah bisi,” ku iya.
Iya madah, nengah langgur pemansang ti nyemetak sereta nyendia diri enggau silik, PBB deka manah agi sereta ulih terus ngiring penyulut Sarawak dikena nangkup juluk timpuh panjai nengah Strategi Pemansang Pengudah COVID-19 (PCDS) 2030.
