KUCHING: Palan Pengintu Pengerai Dalam Komuniti (PDK) udah dikemendar buka bepun 25 Ogos tu.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madah, PDK semina dibuka ba pelilih zon gadung aja.
“Pengudah baum enggau Komiti Penyangga Penusah Ngenyit Nengeri (JPBN) pagi tadi (kemari), kami ngasaika PDK udah tau dibuka baru pengudah empat bulan lebih ditutup.
“Kami meri timpuh dua minggu endur raban pengereja pengawa PDK ba selampur Sarawak nyikap diri nitihka atur pengawa standard (SOP) ti udah ditetapka perintah sebedau dibuka kena 25 Ogos tu ila,” ku iya.
Fatimah bejaku munyi nya ba aum pemberita atur pengawa standard (Garis Panduan) Nyeliahka Covid-19 ba Palan Pengintu Pengerai Dalam Komuniti (PDK) di Wisma Kebajikan Taman Sukma, Jalai Sultan Tengah ditu, tadi.
