SIBU: Parti Progresif Demokratik (PDP) mantaika nama Kaunselor Joshua Ting nyadi chalun bepenau Gabungan Parti Sarawak (GPS) ungkup penuduk Dun Bawang Assan ba Pengawa Bepilih Besai Negeri Ke-12 (PRN12).
Pekara nya dipansutka Presiden PDP Dato Sri Tiong King Sing maya Program Ketuai Begulai Enggau Rayat ba Rumah Ali Jampi, Nanga Tutus ditu kena Hari Enama tu tadi.
Ting endang Ketuai Nembiak PDP Bawang Assan lalu iya mega Kaban Kaunsil Pelilih Menua Pesisir Sibu (MDLBS) beumur 35 taun sereta ngemeranka pengawa dagang kediri empu.
Iya asal ari Sungai Bidut mega dalam sitak Dun Bawang Assan.
Tiong ke mega Kaban Parlimen Bintulu madah, PDP ngaga pemutus nya seriris enggau juluk parti ti keranka orang biak sereta baru.
“Nya alai, PDP merambu nganjung nama iya ngarika PDP-GPS ba penuduk Dun Bawang Assan ila.
“Iya (Ting) agi biak lalu ngembuan mayuh penemu ke baru. Nya alai kitai deka orang biak diangkat,” ku iya.
