SIBU: Pechaya ngagai diri empu lalu enda mudah takut nyadi kunchi penyulut Imran Azim Iskandar, pemain biola bepenau ari Sibu bulih midul empas enggau bulih gelar champion ba kategori klasik.

Tu nunjukka Imran udah ngemegah menua nengah Pekit Seni Pemerindang Dunya (WCOPA) ti diatur ba Anaheim, California, Amerika Syarikat, empai lama.

Imran lebuh dirandau pengudah ba Padang Bilun Sibu madahka pemujur iya nya ukai semina ari pengekih diri empu tang mega berekat sukung apai indai, pengajar enggau bala bakih.

Mulaika kenang maya bepekit, Imran madahka iya napi pemar laban bepadan enggau penyereta ari menua bukai ti chukup landik enggau profesional.

“Aku takut bepekit enggau sida tang pengudah niki atas panggau, dia aku ngasaika diri ulih ngereja pengawa tu lalu ngasaika tu meh peneleba berega,” ku iya.

Pemulai Imran udah diambat sida sebilik, bala bakih, pengajar enggau mega ADUN Bukit Assek, Chieng Jin Ek.

Nembiak Pom Lima ari Sekula Sekondari (SMK) Bukit Assek nya madahka pemesai guna bebasaka apai indai.

“Genap pemutus apai indai nya pemadu manah ba kitai. Nya kebuah, pajak ke pengawa dikerindu kita laban nya ulih meri pemaik ukai semina ngagai diri empu aja tang ulih ngemegah menua, diri sebilik enggau mega komuniti,” ku jaku peransang Imran.

Nangkan nya, apai Imran, Iskandar Bujang madahka diri berasai gagit enggau temegah meda penyulut anak iya.

“Laban tudah Imran tu bepekit enggau pemekit menua luar, kitai tau ngumbai iya ‘underdog’. Penyulut Imran enda disadang.

“Aku gaga meda penyulut anak tu lalu ngarapka iya terus meri peransang ngagai nembiak bukai di Sibu,” ku Iskandar.

Ku Iskandar, ukai mudah anak iya ulih nyemela tauka magi awak diri entara belatih enggau belajar.

“Imran tu nembiak Pom Lima ke benung nyikap diri napi peresa Sijil Pelajaran Malaysia (SPM), timpuh iya belatih pandak enggau maya ujung minggu aja,” ku iya nyemetak.