KUCHING: Pekit Golf Trofi Chairman Kaunsil Pemansang Ekonomi Sarawak (SEDC) Renggat Ke-26 lanchar diatur di Damai Golf and Country Club (DGCC) ditu, Hari Enam tu tadi.
SEDC ba sebengkah penerang madah, pekit nya diatur dikena ngelakuka DGCC nyadi palan besai golf di Sarawak enggau nempa pelasar rentayan ti nyulut.
“Tu mega dikena mandangka pengeransing SEDC meransang gaya idup bepengerai nengah inisiatif lumba korporat kelimpah negap pemanah kaul enggau raban pemegai taruh,” ku penerang sebaka.
Nangkan nya, Chairman SEDC, Tan Sri Datuk Amar Dr Abdul Aziz Dato Husain nyemetak madah, pekit nya ukai semina pekit aja.
“Tu siti pelasar dikena ngempung ruang bilik besai SEDC, bakih kunsi enggau bala penyukung dikena ngerami pengawa begulai baka lumba enggau pengeliat ati,” ku iya rambau program merarau ditu, Hari Enam tu tadi.
Lebih 100 penyereta nyengkaum pegawai tinggi perintah, tuai korporat enggau temuai dipebasa masuk pekit nya ti dibagi ngagai dua kategori iya nya Kategori Dikangau Khas enggau Tebuka.
Ungkup Kategori Dikangau Khas (lelaki), gelar champion dipenggi Datuk Edwin Abit lalu dientudi ke Sang Chan Lee enggau Hanif Mohd Yusof ti bela ba penuduk kedua enggau ketiga.
Pia mega, ba kategori sebaka (indu), Puan Sri Datin Amar Nur Ashima Aziz mujur ngempu gelar champion, penuduk kedua dipenggi Datin Patinggi Puan Sri Datuk Wira Lorna Enan Muloon lalu Sharifah Arafah ba penuduk ketiga.
Nambah ke nya, ungkup Kategori Tebuka (Gross Category), penuduk champion dipenggi Choo Kueh Fong lalu penuduk kedua enggau ketiga diempu Saboni Kadir enggau Yusri Jusmail.
Ba kategori sebaka (Net Category), Mohd Ridzuan Ahmat ba penuduk champion lalu dientudi ke Zaharudin Opon enggau Pang Kim Fah ba penuduk kedua enggau ketiga.
Dr Abdul Aziz mega beterima kasih ngagai sukung enggau kerejasama tegut bala pemelanja ti seruran ngelempai pengandal ati sida ngagai SEDC.
