MIRI: Opis Menteri Pelajar Malaysia (KPM) ngemerat sekeda pugu strategik ti nyadi inisiatif besai dikena ngangkat kualiti enggau negapka program pelajar khas ba menua tu.

Sapit Menteri KPM, Lim Hui Ying madah, nya nyengkaum pengawa ngemanahka agi akses enggau mobiliti kelebih agi nyendia abis nadai empat fasiliti pemun.

Ku iya, empat fasiliti pemun nya mungkur tisi landai, tisi bepegai, agu siruka orang nyelai pendiau (OKU), entepan entukar OKU sereta nyeleti kelas pelajar khas enggau Palan Servis Pelajar Khas (3PK).

Inisiatif nya, ku iya, bela ngerintai pengawa negap modal mensia nengah pengawa nambahka profesionalisme betampung ngagai bala pengajar enggau penulung pengatur nembiak (PPM).

“Kitai mega bela negapka pengawa ngajar enggau belajar, kokurikulum sereta pemansang pengulih Nembiak Begunaka Perengka Pelajar Khas (MBPK).

“Kelimpah ngemanahka agi sistem nengah pengawa nyendia bemacham sukung ngagai MBPK dikena ngurang penanggul ditapi sida ari pengawa nitih pelajar bekualiti enggau sebela.

“Berebak enggau nya, pengawa ngatur data enggau negapka atur pengawa mega diberi perati khas,” ku iya.

Hui Ying mansutka jaku nya ba sebengkah penemuai gawa ngagai Sekula Sekondari (SMK) Dato Permaisuri ditu, sehari tu.