BALAI RINGIN: Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan meransang bala nembiak menua pesisir belajar bebendar laban nya nyadi pugu ngulihka pengidup menyana agi dudi hari.

Ku iya, pelajar nya pugu pemujur pengidup dudi hari, seraya pesaka enggau penyerakup nyadi tiang pemun penegap komuniti menua pesisir.

“Aku meransang semua raban nyengkaum apai indai, pengajar enggau komuniti sama besaup bejalaika inisiatif mantu bala anak bulih peluang pelajar ti manah agi,” ku iya.

Iya nibar ke jaku peransang nya ba Pengerami Bejadi Logo Baru Kampung Ensebang Sungai Burak enggau Kelai Nyua Ramu Berumah, Hari Minggu tu tadi.

Berebak enggau nya, Snowdan mantangka penemu pemesai guna ngintu enggau ngetan pesaka budaya lokal ti nyadi identiti komuniti Sarawak ti patut terus dibasa rebak biak.

Kaban Kunsil Nengeri (ADUN) Balai Ringin nya madah, opis menteri sida udah ngagihka bajet khas dikena ngatur bemacham kus, woksyop enggau kelas bekaul seni sereta main asal lokal ngambi pesaka nya terus lati enggau idup ba arus pemansang moden.

Kelimpah ari nya, iya mega ngingatka komuniti terus ngetan pengelantang enggau penyerakup ba renggat genturung pendiau, ti nyadi pun pengelantang enggau pemansang begulai.

Iya mega meransang peranak terus idup sama betulung, bebasa ke pangan diri sereta besaup nentuka genturung pendiau meruan likun, lantang enggau maju.

Ba pengerami malam nya, Snowdan mega ngemendar sekeda agih belanja komuniti nyengkaum ngaga baru Dapur Gerempung Indu, pemeri RM3,000 ngagai Gerempung Pelajar, RM5,000 ngagai Gerempung Indu sereta agih belanja tambah ungkup Komiti Pemansang enggau Pengelikun Genturung Pendiau (JKKK) ti deka diberi pun taun baru. – EDISI UKAS