KUCHING: Peluang pelajar tinggi enda bebayar enggau penegap ekonomi ulih matak mayuh agi peranak Sarawak ti belajar di menua luar pulai gawa ba nengeri diri empu.

Kaban Kunsil Nengeri (ADUN) Batu Kitang, Datuk Lo Khere Chiang, madah peranak Sarawak enda patut ditagang belajar di menua luar, tang patut diperansang dikena ngemuntang sida pulai meri bantu sereta meri servis di nengeri tu.

“Pelaba aku, bala ketuai kitai kemaya hari tu udah bejalaika pengawa enggau manah, belabuh ari niang Pehin Sri Adenan Satem, baka isu Sempekat Malaysia 1963 (MA63) ti udah muka mata rayat Sarawak pasal hak kitai.

“Nya alai, nengah chara nyendia peluang sereta nyendiaka pelajar enda bebayar, enda ngira bansa enggau jalai pengarap, aku meda nya deka narit ati raban nembiak kitai.

“Pekara nya deka meri kebuah ngagai sida pulai gawa ke Sarawak sereta nempa Sarawak nyadi manah agi jemah ila,” ku iya.

Khere Chiang bejaku munyi nya rambau aum pemberita Ekspo Pelajar enggau Peluang Kereja Perintah Sarawak ba Indu Opis Parti Sa’ati Rayat Sarawak (SUPP) ditu, kemari.

Ku iya, peranak Sarawak diatu majak meretika nengeri tu ngembuan rampa menua ti manah sereta ngembuan pengeraja asal ti bisi potensial dikemansangka.

Tandu iya, perambu bala ketuai nengeri ti deka ngemansangka ekonomi mega udah nyadi peransang ngagai penatai pemeranak puku ke Sarawak.

Berindik ari nya, iya madah kuing pemansang ti nyemetak ulih matak peranak Sarawak ti benung belajar tauka gawa di menua luar pulai meri servis sereta meri bantu ngagai nengeri tu.

“Premier Sarawak kitai seruran madahka kitai ulih ngereja nya laban kitai bisi pengelebih sereta ulih nyapai mayuh agi,” ku iya.