BAU: Program Randau Komuniti 2026 diatur Unit Komunikasi Awam Sarawak (UKAS) majak tegap nyadi pelasar beguna ngenatai penerang bekaul polisi, inisiatif enggau pemansang Perintah Sarawak ngagai rayat, lebih agi peranak menua pesisir.
Sapit Menteri Pengangkut Sarawak (Sungai enggau Tasik) ke mega Kaban Kunsil Nengeri (ADUN) Tasik Biru, Datuk Henry Harry Jinep madah, program nya ukai semina ngundang rayat aja, tang nyadi nalan ke nemban nyempil kaul entara perintah enggau rayat.
Ku iya, nengah program baka Randau Komuniti, peranak bisi peluang ngulihka penerang ke betul pasal mayuh bantu, inisiatif enggau program pemansang ke disediaka perintah.
“Mayuh inisiatif ke udah dipejalaika Perintah Sarawak, nyengkaum ngena pelasar digital Sarawak Pay (diatu S Pay Global), sereta mayuh bantu ngagai anak Sarawak.
“Bisi mega skim bantu pelajar baka Skim Pelajar Tinggi Pechuma (FTES) enggau bemacham insentif disedia dikena mantu nembiak nampung pelajar ngagai palan pelajar tinggi,” terang iya.
Jinep nerang pekara nya lebuh bejadika Program Randau Komuniti 2026 di Balai Mayuhguna Kampung Sebobok, ditu, Hari Enam tu tadi.
Kelimpah ari nya, iya madah ke perintah majak meri perati ngagai pemansang infrastruktur enggau perengkaguna pemun nyengkaum bekal ai beresi, fasiliti mensia mayuh sereta bungkur telekomunikasiyen dikena nambahka pengelantang rayat ba menua pesisir.
Berebak enggau nya, iya minta rayat ngena manah pemansang teknologi sereta seruran bejimat ari kena tipu nengah tali arus ke majak nyadi diatu.
Program Randau Komuniti 2026 UKAS mega ngaul mayuh agensi perintah ke nyendiaka pemandang, bekunsi penerang sereta servis sida ngagai peranak menua nya.
Program nya nyadi nalan betemu mua ke nemban entara perintah enggau rayat dikena ngenegapka pengawa ngenataika penerang enggau nyempil kaul komuniti.
Program nya mega diatur ngena pengerichah pengerami Gawai Dayak lalu ngemauka agi semangat penyerakup enggau segulai sejalai ba rayat pupu bansa dia.
Sama datai, Pegawai Pelilih Bau Eddy Nayoi. – EDISI UKAS
