KUCHING: Perintah Sarawak sedia meri peluang kerejasama ngagai Sabah ba serikat penerebai bilun AirBorneo ti disadang belabuh beoperasyen taun baru.
Premier Sarawak, Datuk Patinggi Tan Sri Abang Johari madah, pintu kerejasama agi bisi nyema perintah Sabah bisi ati deka ngambi ekuiti dalam AirBorneo.
“Keterubah suba bisi niat ngambi bagi ba ekuiti ari Perintah Sarawak enggau Sabah.
“Taja pia, lebuh kami ngambi serikat penerebai bilun nya, Perintah Sabah minta ditangguh dulu.
“Tang, peluang agi bisi enti sida deka ngambi ekuiti dalam AirBorneo,” ku iya.
Abang Johari bejaku munyi nya lebuh ditanya pemberita pengudah bejadi Opis AFFIN Bank Pampang Hikmah Exchange ba Hikmah Exchange ditu, kemari. Nerang silik, iya madah, penemu pasal pekara nya mega bepanggai ba komuniti Sabah empu laban Sarawak enggai masuk champur ba pengawa sida.
“Nya tepulai ngagai peranak Sabah empu, tu utai dikedeka peranak Sabah mega, nya alai pekara nya tepulai ngagai sida.
“Enti sida enggai bekerejasama, AirBorneo sigi enggi Sarawak penuh.
“Nya nadai meri penanggul, semangat kerejasama nya endang bisi,” ku iya. Sebedau tu, Abang Johari madah ke Sarawak udah ngelalu Sabah nanggam kerejasama ba serikat penerebai bilun baru AirBorneo. Ku iya, Perintah Sarawak udah beranakka puku dikena numbuhka serikat penerebai bilun nya sereta ngelalu Sabah nyadi bakih strategik.
Iya nyemetak madah, Sarawak sedia deka bekunsi pengeransing nya enggau Sabah, setipak enggau nama serikat penerebai bilun nya, AirBorneo.
