KUCHING: Perintah Sarawak chakah nyeleti infrastruktur dikena ngerumban pemansang ba sitak Kunsil Nengeri (DUN) Batu Kawa.
Nya nyengkaum nerus projek nyeleti jalai menua pesisir Renggat Lima ungkup ngemanahka agi jalai nya ke pemaik peranak lokal dia.
Sapit Premier Sarawak, Datuk Amar Dr Sim Kui Hian madah, renggat nya mungkur 12 genturung pendiau ba sitak DUN Batu Kawa.
“Tu nyengkaum Kampung Rantau Panjang, Kampung Stapok Melayu, Stapok Utama, Kampung Sinar Budi Baru, Kampung Sinar Budi Lama, Jalai Ming Chung, Lorong Sin San Tu B, Lorong Kangkok, Lorong Kim Choo Sing, Lorong Sungai Tapang, Lorong Hua Soon enggau Lorong Sejijik.
“Bisi 273 peranak dia deka bulih pemaik ari projek nyeleti jalai tu ti mungkur 5.7 kilometer (km) pemanjai,” ku iya.
Dr Sim mansutka jaku nya rambau bejalaika pengawa matau taba projek nyeleti jalai nya empai lama.
Ngelansa silik, ku iya, renggat keterubah ba taun 2020, raban sida mujur nembuka projek melakin jalai 12.48 km.
Berebak enggau nya, iya madah, bisi 294 peranak dia bulih pemaik ari projek nya.
“Nangkan nya, ungkup renggat kedua ba taun 2021, kami nambah projek tu enggau pemanjai 4.56 km ti meri pemaik ngagai 426 peranak dia lalu dientudika 3.55 km ti bukai ba taun sebaka enggau meri pemaik ngagai 85 peranak dia.
“Pia mega, ba taun nyin kemari, kitai mujur nembuka urung satu km ba renggat keempat ke pemaik 53 peranak dia.
“Sepanjai empat taun ti udah, urung 28 km jalai menua pesisir ba sitak DUN Batu Kawa mujur diseleti sereta meri pemaik ngagai 1,131 peranak dia,” terang iya.
Nya alai, ku iya, laban sitak DUN Batu Kawa besai enggau mayuh jalai bebatu, program nyeleti jalai nya deka ditampung berenggat enggau sistematik.
