LUBOK ANTU: Taja nujah bah nepan trak Opis Penyangga Orang Periman Malaysia (JPAM), Kaban Parlimen Lubok Antu, Roy Angau Gingkoi tetap datai nyempil kaul enggau rayat ba Program Segulai Sejalai Nuju Pemansang Menua ke diatur ba Rumah Bruin, Tabut Skrang, Engkilili, ditu ensanus.

Lebuh bejadi program nya, Roy madah ke pemansang patut dipeda ari sukut ke besai agi, ukai semina ba projek fizikal tang mega nyengkaum pengelantang rama enggau pemansang komuniti.

“Pemansang ke meruan patut dipejalai nipak pengelantang rayat sereta penyerakup komuniti ngambi penguntung nya ulih diasai ke serap komuniti,” ku iya.

Ba awak nya mega, Roy bisi ngagihka belanja sepenyampau RM228,000 dikena nyukung pemansang enggau ngemujur pengawa komuniti ba Rumah Bruin.

“Agih belanja nya nyengkaum RM200,000 nengah Program Transformasyen Menua Pesisir (RTP) 2027 ungkup pengawa meli kereban berumah, RM20,000 dikena nyukung aktiviti Komiti Pemansang enggau Pengelikun Genturung Pendiau (JKKK) sereta RM8,000 ungkup Gerempung Indu Rumah Bruin,” ku iya.