SIBU: Gerempung Melanau Sibu (PMS) dipinta ngerembaika tanggungpengawa sereta ngemeratka pemansang ekonomi digital enggau pekara pelajar nembiak rebak baru.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, PMS patut ngaga ubah, ukai semina ngintu pengeraja main asal tang nyendia awak ba pemansang modal mensia nipakka peminta jeman baru.
“Ekonomi digital pekara jemah ila. PMS ulih mantu bala nembiak belajar dagang online sereta beratika bantu perintah baka ke Bantu Barang Diguna Sarawak (SKAS),” ku iya.
Abdullah madah munyi nya ba Pengerami Nutup Fiesta Jom Adik Kakak 2025, Laman Gerempung Melanau Sibu, kena Hari Minggu tu tadi.
Datuk Abdullah mega nyukung peminta ngangkatka begunan PMS nyadi begunan pesaka Melanau ti keterubah di Sarawak.
“Begunan tu nyimpan sejarah besai nyengkaum tuai baka Tun Taib Mahmud.
“Ngaga galeri sejarah di begunan tu deka ngangkat penuduk komuniti Melanau di mata dunya,” ku iya.
Fiesta Jom Adik Kakak 2025 ke diatur pengelama tiga hari ukai semina ngerami pesaka Melanau tang nyadi pelasar ngangkat komiti ba pekara digital ekonomi, pekara pelajar enggau dagang.
Bela datai, Chairman PMS, Mohamad Anis Ili, Sapit Chairman Kaunsil Mengeri Sibu, Kaunsilor Mohammed Abdullah Izkandar Roseley enggau Penghulu Datin Dayang Fatiyah Tun Abang Salahuddin. -EDISI UKAS
