DALAT: Pemansang deras di Dalat, lebih agi ari sukut infrastruktur enggau rumah, ngayanka pengeransing pengari rayat sereta sukung Perintah Sarawak ba pengawa nambahka pengelantang rayat menua nya.
Sapit Premier Sarawak, Datuk Amar Awang Tengah Ali Hasan madah, ubah ke nyengala di Dalat ulih dipeda ari peneleba iya empu gawa ba menua nya sebedau tu.
“Tu nunjukka pengari rayat ba menua tu gawa lalu Perintah Sarawak mantu sereta nyukung pemansang tu.
“Kitai patut milih pengari rayat ke gawa ngambi ulih nyaga Sarawak belama,” ku iya.
Iya nibarka jaku nya ba mua mayuh rambau Pengerami Tuai Begulai Enggau Rayat Parti Pesaka Bumiputera Bersatu (PBB) Sarawak Pampang Dalat, ditu Hari Minggu.
Seraya Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, bisi 577 peranak Dalat nerima pemaik nengah Program Projek Mit Pemansang Menua Pesisir (MRP) enggau Program Ngadu Rumah Mesekin Sarawak (PPRMS) kenyau ari 2018, ngaul agih belanja sepenyampau RM7.469 juta.
Ku iya, bisi 1,991 penerima bela nerima bantu pelajar kenyau ari 2010 ungkup mayuh renggat belajar nyengkaum setipikit, diploma enggau degree, enggau semua nya manggai RM1,010,750.
Ba pengerami ke sama, bisi 34 penerima nerima pampas tanah penyampau RM1,444,615.20 ungkup projek Jalai Penyambung ke Kampung Tanam Seberang. — EDISI UKAS
