SRI AMAN: Perintah Sarawak majak ngerembaika servis ngagai rayat datai ba renggat baruh ngena chara ngundang ke menua nengah Program Sarawakku Sayang (SKS).
Kaban Parlimen Batang Lupar, Mohamad Shafizan Kepli madah, chara nya ngayanka Perintah Sarawak naka ulih nentuka pemansang nengeri ukai semina di mengeri besai aja, tang bela diasai rayat ba menua pesisir.
“Kitai deka ke pemansang digaga di Sarawak ukai semina di mengeri besai aja, tang bela diasai rayat ba renggat baruh, lebih agi kitai di Sri Aman tu,” ku iya.
Iya nibarka jaku nya lebuh pengerami nangguhka Program SKS 2026 Sitak Sri Aman ditu, Hari Minggu.
Iya nerang, bisi 52 agensi enggau opis perintah, raban perintah lokal (PBT) enggau gerempung ukai dikuasa perintah (NGO) ngambi bagi enggau nyendiaka 170 bansa servis mungkur pekara pengerai, pelajar, ngintu pengelantang enggau digital.
Iya madah, program nya bela ngatur Sarawak Pavilion ke chukup nyulut ari sukut pemujur, polisi enggau aspirasyen pemansang nengeri, nyengkaum pemansang infrastruktur jalai alun, bekal ai enggau elekterik.
Program SKS 2026 Sitak Sri Aman ngerikod 108,452 pengusung datai sekumbang tiga hari diatur.
Pemayuh tubuh nya mungkur 23,233 pengusung ba hari terubah, 43,694 hari kedua enggau 41,552 ba hari ketiga. — EDISI UKAS
