KUCHING: Bemacham inisiatif tanggungpengawa rama korporat (CSR) Bintulu Port Holdings Berhad (BPHB) serimbai Sarawak Regatta 2026 meri perati ngagai pengelantang komuniti, sukung ngagai pedagang lokal sereta nyaga pesaka budaya Sarawak.
Presiden ti mega Tuai Pegawai Eksekutif Gerup BPHB, Anuar Ismail madahka inisiatif nya mandangka pengeran kompeni nyungkak pemansang rama enggau pengelantang komuniti, kelimpah meri perati ngagai pemanah dagang.
Iya madah munyi nya ba Pengawa Nyuaka Simbolik Pemeri enggau Kolaborasyen Program CSR serimbai Sarawak Regatta 2026, di Tebing Ai Kuching, kena Hari Minggu.
Entara inisiatif dipejalai iya nya nyuaka barang diguna pemun ngagai Kaunsil Pelawat Asrama Akhlak Kuching sereta pemeri ngagai Klinik Pengerai Indai enggau Anak Bintawa dikena mantu nambah pengelantang penguna.
BPHB mega nyukung pedagang perau penambang nengah pemeri dikena nambah jereki sida seraya ngenang pemesai guna pengangkut ai nyadi sebagi ari pesaka pengidup komuniti sarawak.
Dikena nyaga seni asal, BPHB nanggam kerejasama enggau Hikayat Sulaman Enterprise dikena nyukung pemeruan seni sulam kain keringkam, pesaka tekstil asal indu Sarawak ti mega ulih ngerandang peluang ekonomi ngagai pedagang menua.
Pia mega, BPHB melanja pengawa ngatur Perauk Sarong di Kuching enggau nyukung Pickleball Fiesta 2026 diatur MAKSAK Indu Sarawak dikena meransang gaya idup bepengerai sereta negut kaul komuniti nengah aktiviti lumba enggau rekreasyen.
Anuar madahka Sarawak Regatta ukai semina program lumba ai, tang mega nyadi pesaka budaya ti mandangka identiti, penyerakup enggau dikemegah rayat Sarawak.
Ku iya, pengawa BPHB ngambi bagi ba Sarawak Regatta ungkup taun keempat bejurut nyadi pelasar negap kaul kompeni enggau komuniti sereta nyukung inisiatif ti meri pemaik ngagai komuniti.
Bela datai, Sekretari Perintah Sarawak ti mega Chairman BPHB, Datuk Amar Mohamad Abu Bakar Marzuki begulai enggau bini ti mega Chairperson MAKSAK Indu Sarawak, Dato Baduyah Bujang. — EDISI UKAS
