KUCHING: E-Boat ngena elekterik enggau sukung energi solar terubah Sarawak Energy ke digaga khas dikena nyaup operasyen Tekat Ai Hidroelekterik (HEP) Batang Ai diberi nama ‘Seri Batang Ai’.
Pengawa meri nama E-Boat nya udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Pangkalan Sapi, ditu Hari Minggu.
Pemanjai 10 meter, Seri Batang Ai disikap sistem meransang elekterik ke digaga raban Pemansang enggau Pemansang (R&D) Sarawak Energy, seraya sistem nya digaga kompeni lokal, Global Fibreglass Industries.
Ke penemu, E-Boat ngena dua injin sepit elekterik ngembuan kapasiti 40 kilowatt tetiap siti enggau energi dipegulai 80 kilowatt, kelimpah sistem nyimpan energi bateri bekapasiti 92 kilowatt-jam.
Sistem bateri ya bela disaup panel solar ba perabung bekapasiti 3.6 kilowatt-peak enggau ulih dichas ngena bekal grid.
Seri Batang Ai ulih bejalai entara 40 ngagai 50 kilometer penyauh, timpuh pejalai urung tiga ngagai empat jam enggau abis laju 25 kilometer sejam sereta ulih ngundan 12 penumpang rejista.
Sistem meransang elekterik ke dikena nadai mansutka asap, kelimpah enda ragak, lalu nya enda ngachau rampa menua enggau biodiversiti.
Kelimpah nyaup operasyen di Batang Ai, e-boat tu bela nyadi pengangkut staf enggau pengusung nyengkaum pejalai gawa teknikal ke ladang solar melepung Batang Ai.
Seri Batang Ai nya nampung inisiatif e-Penambang Sarawak Energy, ke sebedau tu ngaul pengawa ngubah perau asal nyadi perau elekterik sebedau dikerembai ngagai pengawa ngaga perau kereja elekterik ke digaga khas.
E-boat tu terubah dipandang rambau pengerami nyambut genap taun ke-40 Batang Ai HEP taun 2025, seraya Sarawak Energy nerima Lisin Bot enggau Permit Pengangkut Sungai (RTP) ungkup Seri Batang Ai kena 21 Oktober tu tadi.
Pengawa meri nama rasmi Seri Batang Ai kelai siti da pemujur Sarawak Energy nyerungkai aplikasyen praktikal teknologi energi beresi ba luar pemansut elekterik konvensional, kelimpah negapka penau R&D enggau penemu pakar inijinia lokal.
Sama datai, Sapit Premier Sarawak Datuk Amar Profesor Dr Sim Kui Hian, Sapit Menteri Engergi enggau Pemeruan Rampa Menua Sarawak Datuk Dr Hazland Abang Hipni, Sapit Menteri Pengeraja Asal enggau Pemansang Mengeri II Sarawak Datuk Len Talif Salleh sereta Sapit Menteri ba Opis Premier Sarawak (Penyeraris Projek ungkup Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi. — EDISI UKAS
