KUCHING: Perintah Sarawak deka terus ngemansangka Sarawak nengah agih belanja RM5.8 bilion ti udah diungkup ngagai nengeri tu ba Bajet 2024.
Kaban Parlimen Sri Aman, Datuk Seri Doris Sophia Brodie madah, agih belanja ti diungkup ngagai Sarawak ba Bajet 2024 iya nya RM5.8 bilion bisi nambah enti dibanding enggau taun tu semina RM5.4 bilion aja.
Ku iya, baka taun-taun sebedau tu, agih belanja ti diungkup ngagai Sarawak mimit agi ari agih belanja ti diungkup ngagai Sabah sepenyampau RM6.6 bilion ba Bajet 2024.
“Taja pia, Perintah Sarawak deka ngena manah agih belanja nya dikena ngemansang enggau nyapai juluk Sarawak nyadi nengeri maju manggai 2030.
“Udah tentu Perintah Sarawak deka chakah agi ngemansangka nengeri tu nengah agih belanja ari Perintah Besai ungkup taun 2024,” ku iya.
Nambahka nya, iya madah, semangat enggau penyerakup pupu bansa ba Sarawak patut ditegap laban nya nyadi pugu ngagai penyelai enggau penegap nengeri tu.
“Penyerakup tu meh ti ngempung kitai begulai mansang ke mua nempa Sarawak maju manggai ba taun 2030.
“Nya alai, perintah patut ngagihka agih belanja ti adil enggau sebela ngagai semua rayat ba nengeri tu enda ngira bansa, chura kulit sereta jalai pengarap ke pemaik begulai,” ku iya nyemetak.
Doris madah, dikena nempa nengeri tu maju, Perintah Sarawak ti betuai ke Premier Sarawak, Datuk Patinggi Tan Sri Abang Johari Tun Openg chakah nyerungkai bemacham teknologi baru, gadung enggau kuasa ulih dikemaru.
