KUCHING: Pemerani enggau ulah talukka menua ti dipandang komuniti Nan Qiao Ji Gong lebuh jeman Perang Dunya Kedua patut diteladan rayat Sarawak ba pengawa sida negapka nengeri tu.
Sapit Premier Sarawak, Datuk Amar Dr. Sim Kui Hian madah, pemerani rebak dulu suba beguna amat laban Sarawak benung mansang deka nempa jemah ila ti menyana, tegap sereta beserakup agi.
“Tiang Pengingat Nan Qiao Ji Gong ukai semina projek ti suah diadu baka nya aja, tang nyadi kelai meri terima kasih ngagai pengawa komuniti bansa China ti nimbal kangau mantu menua China maya Perang Dunya Kedua suba.
“Lebuh Jipun megai menua pesisir, perintah enggau rayat China napi pemar ngulihka bekal senyata, nyentukka ngaga jalai kelaung nengah Burma dikena nganjung bantu ngagai menua nya,” ku iya.
Dr. Sim bejaku munyi nya rambau pengawa nasih tanah Tiang Pengingat Nan Qiao Ji Gong di Palmarium Park, Kaunsil Mengeri Kuching Selatan (MBKS) ditu, kemari.
Ku iya, pengawa nya mandangka pemerani nyelai ari sida ti sanggup mantu ngaga jalai alun, jalai kerita api sereta ngadu pengawa nyadi mekanik rambau perang suba chukup besai reti.
Iya madah, lebih 3,000 komuniti China ari Malaysia, Indonesia enggau Thailand pulai ke China taja pan sida ukai peranak menua China mantu menua nya.
“Pemeri enggau jasa sida nyadi komponen ti beguna ba pengawa China ngelaban Jipun.
“Enti nadai tulung ari sida tu penuduk China kemaya hari tu nyangka enda sebaka,” ku iya.
Nya alai, iya meransang rayat Sarawak ukai semina berundingka nama utai ti ulih digaga menua tu ungkup sida, tang sida patut meri bantu ngagai pemansang nengeri tu.
Ku iya, Perintah Sarawak seruran bebendar deka mantu naka ulih penyampau peranak Sarawak, tang rayat mega patut bejalaika tanggungpengawa kediri empu dikena nentuka nengeri tu terus maju sereta mujur.
Ku iya, pengudah tembu jeman Perang Dunya Kedua, diatu nyau 80 taun rayat ngasai ke pemaik enggau pengelantang.
Nya alai, iya mesan ngambika rayat terus ngemeratka pemaik laban pemedis siti menua nyapai penyulut balat mar enti menua majak napi penyarut sereta bemunsuh.
