PENGEPUH siku pengajar ti nujah beribu batu ari Negeri Sembilan ngambi gawa ba ulu Kapit, Sarawak kelai pengeransing gawa ngemansang landskap pelajar menua.

Raban pengajar sanggup ninggalka ruang bilik diri, ngiar ke pengelantang ba mengeri enggau berambunka nyawa ngerenchah sungai sereta jalai batang dikena nyeridi anak bansa nentuka anak ba ulu sungai bulih akses pelajar ti sebaka.

Ba Pengajar Muhamad Hisham Husin, 35, kenang keterubah dianjung ngajar ba Tanah Kenyalang ukai semina nempa pejalai kereja diri tang mega nyadi peneleba berega enggau bezai reti ti ngubah prinsip idup iya nyadi siku pengajar.

Kena 29 Januari 2015, Cikgu Muhamad Hisham Husin, peranak asal Negeri Sembilan nerima selatan diberi Tuhan lebuh skrin telefon iya mandangka siti pesan ti ngasuh iya ngembuan mayuh pengasai ati; sinu, tegepang enggau gaga.

“Tahniah. Anda dipostingkan ke Sarawak.” Nya mih pesan ti ngasuh iya tebelenga enda lama. 

Ba siku graduet pengajar ti enda kala pansut jauh ari nengeri asal diri, leka jaku Sarawak nyau asai ke siti utai ti enda nyengala enggau jarang didinga.

Tang, nadai sapa nyangka menua ti suba dikenangi diatu nyau nyadi palan pemadu dikerindu enggau dikesayau.

ENDA NYANGKA

Nya mih kisah pengeransing, pemerani enggau chara siku pengajar neleba kediri enggau sanggup nujah andau penguji ba menua ulu ngambi ulih ngesan pangku pengawa nyeridi anak bansa. 

Ngenang sebedau ngajar ke menua ulu, Pengajar Hisham madah kediri anak ti semampai enda jauh ari rumah laban semina diau ba rumah enggau mindah ke mengeri Seremban aja.

Kenyau ari tadika, besekula nyentuk tembu nampung pelajar ba Palan Pematih Pengajar (IPG), iya enda kala bejalai jauh.

Nya kebuah, lebuh pemutus endur dianjung ngajar, iya madah kediri berasai tekenyit.

“Mama, abang dapat posting ke Sarawak,” ku Pengajar Hisham ngagai indai iya.

Ku Pengajar Hisham, indai iya bisi tiga pekara ti pemadu dikenakut iya nya dianjung gawa ke Sarawak, dianjung ngagai sekula menua ulu lalu jadi enggau indu Sarawak. 

Tang, dua ari pekara dikenangi indai iya nyadi nyata lebuh dianjung gawa ke Sarawak lalu pekara ketiga nyadi nangkan nya.

Pekara pemadu ngenyinu ati lebuh iya bekejang ke padang bilun enda dianjung apai indai ketegal bisi pengawa nyaga kantin sekula.

SINU

Ba tengah pengiruh Padang Bilun Antarabansa Kuala Lumpur (KLIA), ai mata iya enda berasai labuh naya.

Semina aka tuai iya ti ulih ngenatai kediri. 

Taja ai mata labuh naya, tang pengeran iya ngesan pangku pengawa nyadi siku pengajar enda kala padam.

Sebedau ngindik kaki ke Tanah Kenyalang, iya dulu iya ninga mayuh cherita negatif pasal Sarawak. 

Tang, iya berumban ngeleda ke sekeda cherita nya datai ari sida ti enda kala meda pemanah, pengelain enggau pengelantang nengeri tu.

Pemar kebendar belabuh lebuh iya diasuh ngeripot diri ba Sekula Primari (SK) Nanga Entuloh, Kapit, ti dikategori nyadi sekula Menua Ulu 3 (P3) iya nya kategori menua ulu pemadu enchabar ari sukut geografi enggau akses perengkaguna.

Peneleba keterubah di Kapit nguji peneguh runding iya lebuh ditanya tanya ti nyelai ari Pengajar Penulung Kanan (PK1).

“Cikgu, cikgu pandai berenang kah?” tanya PK1 nya.

Lalu Pengajar Hisham pen nyaut,“Tak pandai, cikgu.”

Tanya ngena jaku pandak nya udah chukup ngasuh iya mayuh utai dirunding sereta nangi laban melaba utai pemadu jai tau nyadi maya ngenatai kediri ngagai sekula nya.

Pejalai ditampung ngena bot ekspres pengelama tiga jam ari Kapit ke Nanga Merirai kediri pengudah PK1 ngenyit diasuh nurun baum.

Sepanjai pejalai ngelayang Sungai Rajang enggau Sungai Balleh, iya enda berani lelap laban irau ke ngelebus ari pengkalan ti patut.

Ngena pengelebih lidah Semenanjung enggau aplikasyen kar ba telefon pintar ti enda tentu manah line, iya enggau ati berani betanya ngagai penumpang bukai ngambi enda tesat ba menua Iban.

Penangi sepanjai pejalai ba sungai ti besai nya betukar nyadi pengelantang pengudah iya ngindik kaki ba pelaman SK Nanga Entuloh.

RUNDING LANTANG

Sekula nya ba tebing ulu sungai sereta dikelingi kampung ti agi gadung.

Pengiruh ba mengeri diatu nyau ditukar enggau bunyi burung, jelu enggau ulih nyirut angin beresi.

Ninting hari, iya ninga bunyi peneras ai sungai, bunyi burung enggau ke bukai ti chukup ngelantang ati.

Pengidup ba menua ulu ngajar iya pemesai reti idup enggau lantang sereta jelan.

Perengkaguna ba sekula lebuh nya mayuh pengelemi lalu bepanggai ba injin api.

Ketegal siti ari dua injin api ti jau, bekal kuasa karan ba sekula nya nyau ditatak lalu pukul 10 mlam, injin api deka dipadam.

“Maya malam hari pengudah injin api dipadam, utai dipeda nyau petang tegayam. 

“Nuan enchelak tauka mejam ke mata, nadai bida sigi petang,” ku iya betundi.

Tang, penanggul nya nyendia peluang ngatur mayuh agi aktiviti ti besai reti lalu ulih negut kaul pengajar enggau nembiak.

Maya lemai hari, bala pengajar mandi ba sungai, memarin enggau makai mi ti dipanduk gulai undang sungai diberi peranak dia.

Ba Pengajar Hisham, entara pemar ti nguji pengeliat ati iya nya dikachau indu utai disebut kerengit.

Bekau diketup indu utai nya ngasuh buku lali iya chelum lalu berasai gatal belama.

Tang, semua nya diterima iya nyadi sebagi ari peneleba idup ba menua ulu.

BELAJAR JAKU IBAN

Ngembuan nembiak semina 23 iku, pengawa ngajar enggau belajar di SK Nanga Entuloh eksklusif agi nentuka pengajar ulih meri perati ngagai semua nembiak. 

Taja pia, pangku pengawa ngajar nembiak Primari Satu ti mayuh bansa Iban ukai pengawa ti muntang kelebih agi opsyen iya Jaku English.

“Tu baka siku manuk ngajar sekelas anak serati, siku bunyi kok kok kok, lalu ke bukai bunyi kuek kuek kuek,” ku iya seraya ketawa.

Pengajar Hisham ngaku, keterubah datai dia, iya nadai seling penemu pasal Jaku Iban.

Nyau ke lama, iya belabuh belajar leka jaku Iban ari bala nembiak lalu nguji ngena leka jaku nya maya berandau.

Ari pemar pengidup enggau gaya rampa menua di ulu Kapit, pekara ti ngasuh Pengajar Hisham labuh pengerindu ngagai Sarawak iya nya pementas enggau pemanah peranak dia.

MENTAS

Taja sida sebilik jauh beribu batu ba seberai Tasik China Selatan, peranak dia begulai enggau iya nyau asai anak sida empu.

Iya suah nerima asil utai tanam, buah kampung enggau asil ikan pechuma.

Iya mega suah nerima empasa tutuk, chabi, buah bemusin enggau ikan semah ti mega entara pemakai nyamai enggau berega ba peranak dia.

Bala nembiak ba menua ulu mega chukup bebasa ke bala pengajar lalu iya ngasai ke pemanah ulah nya pedis ditemu ba mengeri.

Ukai naka nya aja, bala nembiak mega gerah tulang nyaup mai barang iya ari pengkalan ngagai kuarters pengajar.

Nya kebuah, pengelurus enggau pemanah ati bala nembiak tu suah diupah iya ngena chokelit enggau ruti.

CHARA BARU

Dikena mutar takah peneleba nembiak ngagai dunya luar, Pengajar Hisham ngena chara visual enggau matak video sereta gambar bekaul pemansang dunya luar maya ba pasar sebedau mandangka nya ngagai bala nembiak dalam bilik kelas.

“Aku suah mesan, semina nengah pelajar aja sida ulih ngubah nasip diri empu enggau sida sebilik,” ku Pengajar Hisham nyemetak madah.

Pengawa nya mansutka asil lebuh semua tujuh nembiak Primari Enam ba sekula nya pas ba peresa Ujian Pencapaian Sekolah Rendah (UPSR) taun nya.

Tambah mega, siku nembiak indu bulih gred A ba subjek Bahasa Malaysia Pemahaman dan Penulisan.

Lebih manis, siku nembiak lelaki ti enda ngelala urup enggau enda nemu macha pas subjek Bahasa Malaysia pengudah semampai diajar enggau diembing iya.

Tanah Kenyalang ukai semina ngajar iya mayuh pekara, tang mega ditu mih Pengajar Hisham betemu sulu ati ke mega siku pengajar indu bansa Iban.

Seduai betemu enggau pangan diri ba siti bot ekspres ba pejalai ari Kapit ke Sibu.

Diatu, seduai bisi empat iku anak iya nya dua lelaki enggau dua indu.

BEBASA KE PANGAN DIRI

Pengudah berapa taun gawa ba SK Nanga Entuloh, iya minta betukar ngagai sekula ti bisi akses jalai alun menyana agi berindik ari berundingka sida sebilik sereta pengelikun bini enggau anak tuai iya.

Diatu, iya ngajar ba SK Nanga Tada di Kanowit.

Nyimpul randau, Pengajar Hisham mesan bala pengajar biak anang takut nerima nyema dianjung gawa ke menua ulu.

“Terima aja nyema dianjung gawa ke menua ulu lalu ngasai ke peneleba ti chukup berega nya.

“Anang jampat muchau tauka ngeransi enggau pengelemi dia.

“Anang mendingka cherita negatif ti apin temu pengamat.

“Jaga ulah, bebasa ke adat asal enggau budaya komuniti dia sereta begulai manah enggau komuniti.

“Pengelurus nyeridi bala nembiak deka nentuka kitai nyadi sebagi ari ruang bilik besai sida,” ku Pengajar Hisham meri peransang. – KALSUM