KKUS NYURA Ubung Ngar Pua Kumbu Ngena Utai Tumbuh Asal Ari Kampung nyadi entara chara dikena ngintu penemu asal sereta ngetan seni nenun Pua Kumbu nyadi reta pesaka bansa Iban.

Kus ti diatur Kaunsil Kraf Sarawak (SCC) pengelama dua hari nya, belabuh ari 18 nyentuk 19 Julai tu tadi mujur dipejalai ba Rumah Mengga, Nanga Sepulau Ili, Sungai Gaat, Baleh.

Kus nya meri penerang enggau latih ngagai bala penyereta senentang chara ngelinsu enggau ngaga chura asal ari utai tumbuh kampung sebedau belabuh nenun Pua Kumbu.

Entara kereban asal ti dikena iya nya urat engkudu, kulit kayu jangau enggau renggat, ti dipalu lalu dipanduk dikena ngemansutka chura ngagai ubung ngar sebedau dikena betenun.

Sepanjai kus nya, bala penyereta dilatih ngereja kediri pengawa nyendia utai kena ngaga chura, manduk, nyelup ubung, mampul tauka nanchang baru ubung sereta nyembi ubung nitih ke chara asal.

Bala penyereta mega diterang senentang adat, penti pemali, sukat sereta chara ti betul lebuh nyura ubung ngar, baka ti udah dijar ari tubuh aki ini kenyau ari kelia.

Kus tu mega meri peneleba ti berega ngagai bala penyereta baru, laban pengawa nyura ubung ngar begunaka pengelandik, pengeliat ati enggau penemu ti chukup dalam senentang pengawa asal nya.

Kelimpah ari nya, pengawa nya mega digembar enggau randau senentang pengawa sosial perubat serimbai Program Komuniti Baleh.

Pengerami nutup kus mujur dipenyadi Kaban Kunsil Nengeri (ADUN) Baleh, Nicholas Kudi Jantai kena Hari Minggu tu tadi ti mega digulu 21 Tuai Rumah ari sitak Sungai Gaat, Sungai Baleh, Sungai Mujong enggau Sungai Oyan.

Bela datai iya nya pengari Residen Bagi Menua Kapit, Opis Pelilih Bukit Mabong, pengari UKAS Kapit, Unit Pemansang enggau Pengelikun Bagi Menua Kapit, Kunsil Pelilih Kapit, Penghulu Anyie Kumbong, Tuai Rumah Mengga, pengari opis perintah, bala penyereta kus sereta peranak menua nya.

Pengawa ngatur kus nya dikearap ulih nentuka penemu ngelinsu sereta nyura ubung ngar ngena perengka ari kampung meruan diintu sereta ditampung ngagai rebak dudi jemah.

Nya alai, kus tu dikearap ulih ngetan penemu asal nyura ubung ngar ngena utai tumbuh asal ari kampung ngambika meruan diintu sereta ditampung ngagai rebak dudi jemah.

Pengawa tu mega beguna endar dikena ngetan seni Pua Kumbu enggau chara ngar asal ngambi meruan nyadi reta pesaka bansa Iban sereta reta berega Sarawak.