KUCHING: Sapit Menteri Utiliti Sarawak (Sarawak Energy Berhad enggau PETROS), Datuk Ibrahim Baki bisi ngabas raban tasah bah ba Palan Ngenduh (PPS) Masjid Darul Istiqlaal, Kampung Sungai Maong, kena Hari Enam.
Ba pejalai ngabas urung setengah jam nya, Datuk Ibrahim ti mega Kaban Kunsil Nengeri (ADUN) Satok mega bisi berandau enggau raban tasah bah seraya berati ke pekara ti nyadi ba PPS nya. Iya udah nyua pemeri ngagai pengari tuai bilik ari 26 ruang bilik ti dipindah ngagai PPS nya ketegal penusah bah.
Nitih ke rikod naka berita tu ditulis, PPS Masjid Darul Istiqlaal, Kampung Sungai Maong ti dibuka kena 2 Januari 2026 diatu ngembuan 128 raban tasah bah ari 26 ruang bilik nyengkaum 70 orang besai tuai, 41 nembiak mit, 16 orang tuai enggau siku anak mit. – EDISI UKAS
