SRI AMAN: Pekara pengelikun enggau pemujur akses peranak menua kelebih agi bekaul jalai ke sekula majak dikemerat lebuh Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis datai ngabas dua infrastruktur ba sitak nya.

Iya ti mega Kaban Kunsil Nengeri (ADUN) Simanggang madah, langgur ngaga baru jematan udah dikenatai, kelimpah minta Opis Kereja Raya nyendia pelin sereta langkar dikena nentuka pengawa mutar diatur.

“Tanggungpengawa aku nyadi pengari rayat datai ngabas sereta matau tiap sebana bekaul perengkaguna sereta penanggul ti ditapi rayat ba sitak Kunsil Nengeri (DUN) Simanggang.

“Berindik ari nya, aku ngarap kerejasama ari rayat ngambi pejalai projek Perintah Sarawak ulih mujur digaga,” ku iya.

Dua palan ti diabas, iya nya jematan gantung di Rumah Mary Tuba, Kampung Munggu Demam, Batu Lintang Undop enggau jematan nuju Sekula Primari (SK) Nanga Klassen.

Pengawa ngabas dipun ba Kampung Munggu Demam ke alai Tuai Rumah Mary Tuba bisi mantai sebana bekaul pejalai projek ngaga selapat sungai semak jematan gantung beungkus RM470,000.

Harden ngabas sereta meresa jematan nya urung setengah jam sebedau nampung pejalai ke SK Nanga Klassen.

Penatai iya sereta bala bukai diambat Kepala Pengajar SK Nanga Klassen, Welfred Manjan Radin.

Pengawa ngabas nya bela disempulang pegawai Opis Kereja Raya enggau Kaunsil Pelilih Sri Aman dikena berati ke guna teknikal sereta nyeraris atur pengawa udah nya. – EDISI UKAS