SARAWAK Delta Geopark ti ngembuan pemesai urung 3,112 km2 iya nya 2,685 km2 pemesai tanah enggau 427 km2 pemesai tasik nyerangkung Pelilih Kuching enggau sebagi ari Pelilih Serian mujur diaku nyadi Serakup Pelajar, Sains enggau Budaya Gerempung Bansa Beserakup (UNESCO) Global Geopark.
Pemujur tu mandangka pengeran Sarawak nyaga pengelain geologi, ekologi enggau pesaka budaya seraya ngelaku dagang temuai meruan. Pengawa nyua setipikit mujur diatur ensanus ba Indu Opis UNESCO di Paris.
Sapit Menteri Perambu Mengeri, Pengatur Tanah enggau Pemansang Rampa Menua, Datuk Len Talif Salleh udah ngetuai diligit Sarawak nerima setipikit nya ti disua Tuai Unit Sains Bumi enggau Geopark UNESCO, Kristof Vandenberghe.
Bela datai, Sekretari Mendam Opis Menteri Pengeraja Asal enggau Pemansang Mengeri, Datuk Abdullah Julaihi, Direktor Kampung Sarawak, Datuk Hamden Mohammad, Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak, Morshidi Fedrick sereta bala bukai.
Nengah setipikit tu, Len Talif madah, Sarawak Delta Geopark udah nyapai pemujur timpuh panjai diaku nyadi UNESCO Global Geopark ba taun 2026 nurai pemujur ti ngemegah ba pengawa ngintu pesaka asal Sarawak enggau Malaysia.
“UNESCO Global Geoparks tu palan geografi tunggal ti begulai ke alai taba enggau landskap nya bisi pengelebih geologi antarabansa dikemansang ngena konsep ngintu, pelajar enggau pemansang meruan.
“Pengawa ngaku tu mega mandangka gaya penteba geologi Delta Sarawak ti nyelai nyengkaum sistem sungai ti bemacham, landskap pantai enggau formasyen sendimen ti nusui kisah bejuta taun sejarah bumi.
“Taman geo tu mega dibungkur mayuh ekosistem baka kampung bakau, paya enggau nanga ti nyukung mayuh biodiversiti.
“Delta Sarawak mega nyadi rumah ngagai komuniti begigaka jereki enggau budaya lalu pengawa ngaku ba tikas global nya mandangka penyelai geologi ba rantau tu, bemacham biologi ti kaya enggau tradisyen budaya,” terang iya.
Berebak enggau nya, iya madah, pemujur nya ngayan pemanah tanggam kerejasama begulai komuniti, ejensi perintah, pemansik enggau bakih kunsi ti udah regas gawa nyaga, ngintu enggau ngelaku Delta Sarawak.
Terang iya, inisiatif sida udah nentuka Delta Sarawak ukai semina diintu tang mega dikemansang chara meruan ungkup rebak dudi.
“Sejarah baru ti diturai tu mandangka pengeran enggau pemanah kerejasama entara komuniti, saintis enggau penempa polisi ngambi begulai nyapai visyen tu,” ku iya mantangka penemu.
Kelimpah ari nya, pengawa ngaku nya nyagu nama Sarawak ba kar global lalu Sarawak deka bulih pemaik ditapat temuai dunya, nyungkak dagang temuai ti meransang ekonomi menua enggau enda ngachau rampa menua.
Nengah status baru tu, Delta Sarawak deka nukang peluang eko-dagang temuai, negap inisiatif bepelasarka komuniti enggau ngelaku pelajar bemalinka rampa menua.
Ke rikod, bisi 12 UNESCO Global Geoparks mujur diaku ba serata dunya iya nya Changsha enggau Mt. Siguniang di China, Terres d’Hérault di France enggau Nisyros di Greece.
Bisi mega Joyce Country and Western Lakes di Ireland, MinéAkiyoshidai Karst Plateau di Jipun, Lenggong enggau Delta Sarawak di Malaysia, Algarvensis di Portugal, Toratau di Rusia, Dahar di Tunisia sereta Manantiales Serranos di Uruguay.
Nya alai, pemujur tu mega nipak pengeran Sarawak mansang ba pemansang meruan enggau nyaga rampa menua kelimpah nyagu Sarawak nyadi palan ekonomi gadung enggau eko-dagang temuai di Asia Tenggara.
