KUCHING: Pengerami Ngelalu Pengabang Hari Raya Sapit Menteri Besai, Datuk Seri Fadillah Yusof dirichahka agi enggau penatai Premier Sarawak, Datuk Patinggi Tan Sri Abang Johari Tun Openg sereta Tuai Pemegai Menua (TYT) Sarawak, Tun Pehin Sri Dr. Wan Junaidi Tuanku Jaafar.
Abang Johari enggau bini iya, Puan Sri Datuk Amar Juma’ani Tun Tuanku Bujang datai dulu urung pukul 9.50 pagi lalu Tun Dr Wan Junaidi enggau bini iya, Toh Puan Fauziah Sanusi datai urung pukul 10.30 pagi.
Program nya mega digulu sekeda bala tuai baka Sapit Premier Sarawak, Datuk Amar Dr Sim Kui Hian, Menteri Dagang Temuai, Industri Kreatif Enggau Seni Pemerindang, Datuk Seri Abdul Karim Rahman Hamzah, Sekretari Perintah Sarawak, Datuk Amar Mohamad Abu Bakar Marzuki.
Nambahka nya, Kaban Kunsil Nengeri (ADUN) Puncak Borneo, Datuk Willie Mongin, ADUN Satok, Datuk Ibrahim Baki, Kepala Polis Sarawak, Datuk Mancha Ata, Chairman Kaunsil Pemansang Ekonomi Sarawak (SEDC), Tan Sri Datuk Amar Abdul Aziz Datuk Hussain enggau bala bukai bela ngabang kia.
Pengerami nya dipelaba digulu lebih 6,000 pengabang ti datai ari rayat pupu bansa kelebih agi peranak Kuching.
Lebuh ditanya, Fadillah madahka pengawa begusung rambau bisi pengerami nya sebagi ari pengawa dikena negap penyerakup pupu bansa ba menua tu kelebih agi ba Sarawak.
Ku iya, ulah nya patut ditampung enggau ditan ngambi rayat ba menua tu ulih begulai manah.
