SARIKEI: Peranak Rumah Angelisa deka ngasai pengidup ti lantang agi enti projek ngaga rumah panjai baru sida tembu ba taun baru.
Projek beungkus RM200,000 nya diatu nyau deka tembu sereta meri seput lantang ngagai peranak dia ti udah lama nganti rumah panjai ti meruan agi.
Projek nya dipejalai nengah Program Transformasyen Menua Pesisir (RTP) enggau Projek Siru Ke Rayat (PMR) nyadi sebagi ari inisiatif perintah negap pemansang infrastruktur di menua pesisir.
Berebak enggau nya, Tuai Rumah Angelisa madah, pengawa ngaga baru rumah panjai nya mai ubah besai ngagai peranak ba rumah panjai nya.
Iya madah, suba sida semina nguan rumah panjai ti repuk, lama enggau enda likun agi diuan.
“Gaya rumah panjai kami sebedau tu mit, lama enggau udah repuk lalu kami ti diau dia pen semampai irau ke pengelikun diri sebarang maya.
“Nengah pemisi rumah panjai baru tu, kami majak andal ke pengelikun enggau pengelantang rumah panjai kami.
“Tu mega meri peluang ngagai sida ti kurang penatai pemisi ngasai ke rumah ti lantang enggau meruan agi,” ku iya.
Iya meri terima kasih laban bisi rumah panjai baru lalu nya kelai penyiru perintah ngagai nasip rayat di menua pesisir.
Tampung iya, projek nya siti tepa ti besai bendar reti ngagai semua sida serumah ti udah lama nganti rumah panjai baru.
Rumah panjai 15 pintu nya nerima Skim Jali Rumah Panjai ari Kaunsil Pemansang Pengawa Berumah (HDC) ti beungkus RM30,000 sepintu.
Pia mega, sida bela nerima belanja tambah ari Kaban Kunsil Nengeri (ADUN) Repok, Datuk Seri Huang Tiong Sii dikena ngelempung tating belanja sida.
Bantu nya dikena nampung ungkus meli perengka berumah kelimpah mandang komitmen betampung perintah ngagai pengelantang rayat.
