INDUSTRI muzik Dayak enda kala sengian laban penatai mayuh artis baru bepenau meri seput baru ngagai industri nya.
Tang ba sida ti rindu ke lagu Iban, nama Eddie Kuwing semampai lekat ba ati sida.
Pengudah nyau deka 20 taun nadai didinga rita, artis tebilang lokal ti datai ari Belaga diatu datai baru enggau lagu iya ti chukup negu tangkai ati.
Nengah pengawa ngelanchar lagu pemadu baru iya ti pejuluk Sayau Ari Intan kena 28 Februari tu tadi ba pelasar YouTube LUH Production, Eddie ukai semina ngelancharka siti lagu aja tang iya mai siti pengingat manis ti negu ati.
MAYUH PENAU
Ada enggau mansang besai ba komuniti Kenyah, Eddie siku lelaki ti semampai ensuruk kediri.
Ba belakang nama besai iya ba industri pemerindang Dayak, iya siku orang ti gawa perintah nyadi pegawai Opis Pengangkut Darat (JPJ).
Ba Eddie, penyemela entara batang pengawa diri enggau pengerindu belagu begunaka disiplin ti tinggi.
Anak keempat ari sida semenyadi nya ngaku pengerindu iya ba pengawa seni ukai ditampung iya ari sapa-sapa tang ba sida sebilik, iya mih orang keterubah ti mujur ‘mechah tradisyen’ begelar artis.
Ba luar jam gawa enggau studio, Eddie rindu agi magi awak iya bejalaika pengawa nginti enggau nero, siti aktiviti ti ulih meri pengelantang.
Penau seni dikembuan iya ukai semina dibantaika iya nengah vokal aja tang mega nengah berus di kanvas.
Pekara nya mandangka iya siku seniman ti chukup versatile enggau mayuh penau.
PEJALAI SENI
Pejalai Eddie ba dunya pemerindang bepun ba taun 1996. Penau iya belagu ditemu TBC Production pengudah iya chakah masuk mayuh pekit belagu di selampur Sarawak.
Pengudah ditisih nengah program nguji penau ti terit, iya mujur ngeluarka album keterubah iya ti pejuluk Semalam Di Kaki Lima ba taun 1997.
Ba taun 2000, iya mujur bediri chechegit ba tuchung pengawa iya nyadi seniman lebuh dilempai pangku pengawa megai watak besai ba telemovie Iban tebilang, Pengerindu Tua.
Ukai semina belakun, lagu tema telemovie nya pen bela ngena lagu ti disadaka iya empu ti pejuluk Pengerindu Tua sereta suah niti mulut mensia mayuh nyentuk sehari tu.
Lagu nya mujur mantang ke nama Eddie Kuwing nyadi siku ari penanyi lelaki pemadu tebilang ba industri muzik Dayak ba jeman nya suba.
Entara taun 2001 nyentuk 2008, iya mujur ngerikod bepuluh iti album enggau kompilasyen.
Enti diitung, lebih ari 100 iti lagu mujur dikeluarka iya sepanjai timpuh iya ngaul diri pengawa merindang.
Taja pen iya semampai ngemaruhka diri empu tang bala peninga ngaku iya nyadi ‘legend’ laban lagu iya mujur ditebah sepanjai jeman.
RETI LAGU
Ukai semina nyadaka lagu Sayau Ari Intan aja, Eddie mega ti nengkebang enggau nyadi komposer ngagai lagu berentak balada nya.
Lagu nya mai bala peninga neresa kisah dua iku sulu tauka bala bakih ti udah lama beserara.
Taja pen jampat amat jam beputar lalu taun majak beganti tang pengerindu ngagai pangan diri enda kala padam dalam ati.
Terang Eddie, iya bulih inspirasyen nengkebang leka lagu nya bepelasarka situasyen maya jeman besekula menya kelebih agi lebuh abis Pom 5.
“Kebendar, lagu tu ngenang sida ti beserara pengudah abis sekula sekali ke nya sida ti benung besulu tauka bala bakih maya nya suba.
“Bisi nya nampung pelajar ke universiti lalu ti bukai gawa ba menua orang jauh ari pengan diri.
“Tang penyayau enggau pengingat manis tetap disimpan teguh dalam ati,” ku Eddie.
Nengah lagu nya, iya mai pesan pasal pemesai guna ngaku bakih enggau pengerindu ti lurus.
Ba iya, pengelurus ati nya kunchi ngagai siti kaul sekali ke nya kaul pengerindu tauka kaul bebakih.
TITI PENGUJI
Ukai pekara ti muntang ba siku penanyi ti udah lama ninggalka studio lalu datai baru ngerikod lagu.
Nya alai, Eddie ngaku pengawa ngerikod lagu Sayau Ari Intan chukup enchabar.
“Aku udah 18 taun enda masuk studio ungkup ngerikod lagu.
“Kelimpah suntuk awak ketegal bejalaika pangku pengawa diri nyadi pegawai JPJ, aku mega napi penanggul pengerai,” ku iya nusui sebana diri.
Tang berekat ari peransang enggau sukung ari raban LUH Production, sida sebilik enggau bala bakih, iya mujur ngerikod lagu nya enggau pengabis ati.
Lagu nya nerima keranjai kreatif ari Jumphul Morcdoc ti nyadi pengatur muzik lalu Davney David nyadi tukang video.
Seduai ngesan pangku pengawa besai nentuka kualiti audio enggau visual lagu nya ba tikas ti ngemantupka ati bala peninga muzik Dayak kemaya hari.
REALITI INDUSTRI
Lebuh ditanya pasal peneleba pait manis sepanjai 30 taun ba indusri muzik Dayak, Eddie nyaut enggau ati lurus.
Iya ngaku diri ngaul industri muzik Dayak ukai ketegal deka ngulih pengaya tang laban iya ngembuan pengerindu besai ba pengawa nya.
“Gaji ari pengawa ngerikod lagu enggau merindang kitai ditu enda baka bala penanyi di Semenanjung Malaysia.
“Taja pen udah nerima mayuh anugerah tang aku tetap sebaka lalu enda ga kaya ba industri tu.
“Nama kebuah aku terus beretan laban aku ngereja tu ketegal pengerindu besai ba pengawa belagu,” terang iya.
Nangkan nya, iya bela ngenang pasal evolusyen industri muzik Dayak.
Kenu ku Eddie, kualiti muzik enggau video muzik (MV) artis Dayak diatu jauh udah maju sereta profesional.
Nya alai, iya andal lagu Dayak ulih rembus makit antarabansa dudi hari.
JULUK DUDI HARI
Eddie madah, iya nadai ngembuan juluk ti tinggi dudi hari laban iya chukup tepantup ati enggau pemujur ti udah dijapai iya ngelama tu.
Semua penyulut pemadu manah mujur diturai iya kenyau ari jeman 90-an suba.
Taja pia, pesan iya nuju bala peninga ngasuh sida berasai ditegu.
“Terima kasih ngagai semua kitai ti nyukung aku kenyau ari suba nyentuk sehari tu. Aku sayau ke kita semua!
“Terus ke sukung kitai ngagai bala penanyi baru kitai Dayak ngambi industri muzik kitai majak maju,” ku iya.
Ungkup bala peninga ti rindu ke vokal Eddie ti chukup lunak didinga nengah lagu Sayau Ari Intan, kita ulih mendingka lagu nya ba pelasar YouTube LUH Production.
