BINTULU: Perintah Gempung Parti Sarawak (GPS) seruran bebendar nyendia pemansang ti inklusif ngambi ngangkat ekonomi rama rayat di nengeri tu.

Ku Presiden Parti Rayat Sa’ati Sarawak (SUPP), Datuk Amar Dr Sim Kui Hian, agenda penyerakup enggau pemansang inklusif ti dikemerat GPS mantu serap komuniti bulih pemaik nadai ngira asal, raban bansa tauka jalai pengarap.

“GPS seruran bebendar nyerakup rayat nengah pemansang meruan ngambi ulih meri pemaik ngagai semua di nengeri tu,” ku iya lebuh bejaku ba Pengerami Makai Lemai Penyerakup SUPP Pampang Bintulu di sebuah restoran tebilang ditu, malam tadi.

Berebak enggau nya, Dr Sim ke mega Sapit Premier Sarawak minta pengundi ba sitak Kunsil Nengeri (DUN) Jepak seruran beserakup lalu meri sukung ngagai Perintah GPS ba Pengawa Bepilih Mit (PRK) DUN Jepak kena 4 November tu.

Dr Sim mega minta urung 1,400 pengundi China ti direjister ba Jepak bejalaika tanggungpengawa ngundi Hari Enam tu.