Penusah bah tunggal di Batu Kawa mesti diputar

KUCHING: Ejensi enggau opis perintah dipinta mansik enggau mutarka penusah bah tunggal ti suah nyadi ba Batu Kawa.

Menteri Kaunsil Kandang Menua enggau Pengawa Berumah Datuk Seri Dr Sim Kui Hian nengah sebenangkah ke dibantai ba akaun media rama (Facebook) iya madah diri udah ngabas Lorong 3 Taman Desa Wira seraya meresa genturung nya apin lama.

Iya dipadahka pasal penusah bah tunggal ba Batu Kawa ketegal bisi pengadang pejalai ai sungai ketegal pengawa ngaga jematan baru di Kampung Sungai Maong.

Kui Hian madahka, piak kunterikta udah setuju neruska kereja ngerumbak enggau meresi pejalai sistem ai tebing sungai ngambika ai ujan ulih anyut enggau deras.

Tandu iya, struktur sementara ba jematan nya deka dipunggah enti pengawa ba endur nya udah tembu dalam beberapa minggu ke deka datai.

“Ngagai ejensi perintah, Opis Parit enggau Entali Ai (DID) enggau Kaunsil Kandang Menua Padawan (MPP) udah meri penerang pasal bah ngenyit di gentung nya.

“Direktor JKR Datuk Ir Zuraimi besemaya deka meda penanggul ti nanggul pejalai ai di ili sungai nya,” ku iya.

Iya mega madahka deka neruska peminta agih belanja RM120 juta dikena nyeruri parit di Taman Desa Wira enggau pelin mitigasyen bah di Batu Kawa.

Ku iya, Kepala Menteri Datuk Patinggi Abang Johari Tun Openg udah ngemendarka agih belanja nya ba taun 2020 enggau diteruska ba Baruh Langgur Pemansang Malaysia Lumpar ke-12 ti deka dipejalaika DID.

Kelimpah Taman Desa Wira, Kui Hian madahka pelin mitigasyen bah ti mungkur tujuh zon ke bukai iya nya Batu Kawa Lorong 1C enggau 3, Sungai Moyan, Sungai Surih, Jalai Field Force, Jalai Ketitir, genturung RPR enggau Kampung Sinar Budi Baru.

Ungku pengawa nyeruri tikas entali Taman Desa Wira ti benung digaga, Kui Hian ngansak DID ngelengkaska pengawa nya lalu meri perati ngagai pengawa nyeruri parit ba arung besemak.

MERESA….Dr Sim Kui Hian maya meresa Lorong 3 Taman Desa Wira seraya ngabas palan ti suah kena tuntung penusah bah tunggal.

Suara Sarawak