KUCHING: Menteri Dagang Temuai, Seni enggau Main Asal, Datuk Abdul Karim Rahman Hamzah mega pechayaka pemutus digaga Kepala Menteri Sabah Datuk Seri Shafiee Apdal sehari tu entara chara pemadu manah dikena mutarka penyarut ba Dun Sabah nya.

“Pengawa dikereja Shafie tu endang chara ti betul enggau iya deka rayat nentuka sapa ti deka megai Sabah udah tu,” ku Karim lebuh dirandau Suara Sarawak sehari tu.

Sapit Presiden Parti Pesaka Bumiputera Bersatu (PBB) nya ngasaika pekara ke nyadi ba Sabah diatu nyau deka sama enggau penyarut politik Sarawak ba taun 1987 suba ti dikumbai ‘Ming Court’.

Berebak enggau nya, iya ngarapka rayat Sabah ulih ngaga pemutus ke betul ba pengawa bepilih ngenyit tu kelimpah muai tanda tanya enggau penyarut pasal sapa ti patut nerima sukung ari Kepala Menteri.