ENGKILILI: Semangat begulai ti nyadi pemun ngintu Pengerami Gawai Dayak meseti terus ditegap laban nya beguna endar ngagai penegap, pengelantang enggau pemansang ti diasai ke Sarawak diatu.

Ku iya, Ngiling Tikai ukai semina kelai tembu ngintu Gawai Dayak, tang mega ngayanka penyerakup pupu bansa ngetan pesaka budaya seraya nampung pengawa ngemansang komuniti begulai.

Uggah nibar jaku nya lebuh Pengerami Ngiling Tikai Gawai Dayak 2026 ba Rumah Kennedy, Langkang Ulu.

Uggah madah, pemansang ti meruan begunaka tuai ti penau, bisi integriti enggau ulih ngamatka pekara ti dilanggur ngagai asil ti ulih diasai ke rayat.

“Pilih mih tuai ti ulih mandangka penau nengah pengawa enggau pemujur lalu ukai semina semaya tauka bejaku aja,” ku iya nyemetak.

Iya mega madah ke sekeda peminta pemansang ti dibantai peranak Rumah Kennedy deka diperati perintah nentuka pengelantang komuniti menua pesisir majak ditambah.

Nangkan nya, Sapit Menteri Dagang Antarabansa, Industri enggau Meranak Puku Sarawak, Datuk Dr. Malcolm Mussen Lamoh madah, perintah deka terus meri perati ngagai pengawa nyeruri infrastruktur pemun ba sitak Engkilili, kelebih agi bekal ai enggau jalai alun.

Ku iya, taja sekeda projek udah dikemendar Perintah Sarawak enggau Perintah Besai, pengawa bejalaika projek nya begunaka atur nyeraris nentuka pemaik nya ulih diasai ke rayat enggau lengkas.

Ba pengerami sama, sekeda pemeri bisi disua dikena nyukung aktiviti pemansang komuniti, nyengkaum RM30,000 ari Uggah enggau RM20,000 ari Sapit Premier Sarawak, Datuk Amar Prof. Dr. Sim Kui Hian ngagai Komiti Pemansang enggau Pengelikun Genturung Pendiau (JKKK) Rumah Kennedy, Langkang Ulu.

Datuk Seri John Sikie Tayai mega bisi nyua pemeri RM10,000 ngagai komiti nya nentuka atur program komuniti dia lanchar.

Pengerami ti mujur diatur nya mega richah enggau mayuh aktiviti main asal lalu mandangka pengeran komuniti majak nyaga adat asal sereta negap semangat Segulai Sejalai ti nyadi pugu penyerakup enggau pemansang Sarawak. – SF