Penyiru, basa neguhka kaul serakup

KUCHING: Rayat menua tu endang patut bebasaka kaul serakup pupu bansa ti udah rat ditanggam ngelama tu.

Jaku tu dipansutka Edwin Banta ngarika Adun Tamin, IR Christopher Gira Sambang lebuh bejadika Pengerami Makai Taun Ke-5 Seraya Ngiga Belanja Kelab Rekreasyen Taman Pandan Jaya kena Hari Enam tu tadi.

Ku Edwin, kaul serakup tu tiang pemun ngenegapka bansa enggau menua kelimpah nentuka rayat ulih diau likun sereta bebaik enggau pangan diri.

“Aku temegah ati meda pemanah kaul kitai ke datai malam tu, nadai belampung ati meri sukung ngagai pengawa bala menyadi kitai ke diau ba genturung pendiau tu.

“Pengawa dikereja bala kaban kelab tu endang patut dipuji sereta ditunda kitai nyadika pelasar penyerakup bansa laban aku nemu kitai ke diau di mengeri Kuching tu datai ari menua bukai.

TIBAR PERANSANG… Edwin Banta ngarika Gira bejaku ba mua mayuh.

“Tu mih peluang kitai mandangka pemereti ati enggau basa begulai enggau diri sama diri laban ngelama tu aku nadai nemu kitai bansa Dayak Iban mayuh diau ba kandang menua Malihah kelebih agi ba Pandan Jaya.

“Jarang mega ninga orang besebut, nya alai aku endang nadai seling penemu kitai bansa mayuh diau dia lalu tu ngasuh ati gagit amat ninga pemujur enggau pengerapit kaul semua kitai,” ku iya madah nyemetak.

Nangkan nya ku Edwin, iya mega andal ati meda kitai bansa Dayak ke diau di mengeri meruan ngemeran ulah idup bebaik, ngempung kaul bala bukai enggau bekerejasama ngatur pengawa.

Ku iya, pekara tu beguna amat nyadika teladan rebak baru ngambika ulih sereta semampai ditampung ngagai rebak dudi dataika jemah.

“Ari basa kitai bisi penyiru lalu ari penyiru kitai deka ngembuan ati talukka bansa enggau menua.

PENGINGAT… Edwin Banta nerima tepa ari Lenggang Nuing seraya dikemata bala bukai.

“Nya kebuah aku madah dulu tadi ke alai penyerakup tu tiang pemun enggau penegap kitai bansa, nentuka pengelikun enggau pengelantang menua.

“Ulah baka tu endang patut diterenak ari renggat tumu sereta kitai ke udah tuai runding tu patut ngembing sida ke nembiak,” tandu Edwin ti mega Sekretari Politik Kepala Menteri Sarawak.

Nya alai ku Edwin, kelai sukung ngagai pengawa kelab ke alai Gira udah ngemendarka agih belanja penyampau RM5,000 enggau pemeri ari kuchik iya empu penyampau RM2,000.

Iya ngarapka bala kaban kelab ngena manah belanja ti udah diagih ngatur pengawa enggau aktiviti pulaika pemaik ukai semina ngagai kaban kelab aja tang bala komuniti bukai ti ampit ngasaika pengelantang ari pengawa dikereja sida.

“Pemeri tu kelai sukung enggau peransang ngagai bala kaban kelab ngambika seruran ngatur pengawa ti mai pengelantang ngagai bala komuniti.

“Pia mega kitai ngarapka sida enda mudah mantul ati gawa mantu raban ti tasah, sida ti begunaka bantu kelebih agi maya penusah ngenyit nuntung,” ku iya.

Berebak enggau nya, komiti kelab betuaika Lenggang Nuing mega bisi nyuaka insentif ngagai bala anak kaban kelab ti teulihka pemutus peresa nyulut sereta pemeri bukai ngagai bala anak kaban ti begunaka bantu.

Pemeri insentif tu nyadika peransang ngagai bala anak ngambi ransing agi belajar kelimpah nyaup ngelempungka tating belanja ruang bilik sida.

Sama datai Presiden Serakup Dayak Iban Sarawak (Sadia) Pampang Kuching, Datuk Paduka Dr Anthony Nait Mani, Menijar Kanan Brooke Dockyard And Engineering Works Corporation, Lubau Genam enggau Chairman Kelab Rekreasyen Taman Pandan Jaya PW (B) Lenggang Nuing sereta disempulang lebih 700 temuai bukai.

REGAS… Bala komiti dipadu gawa ngemujur Pengerami Makai Taun Ke-5 Seraya Ngiga Belanja Kelab Rekreasyen Taman Pandan Jaya.