KUCHING: Maraton Sarawak Energy 2026 deka diatur 9 Ogos tu ngena konsep baru sereta nyendia perais besai agi dikena matak penyereta ari mayuh tikas peneleba.

Ku Menteri Utiliti enggau Telekomunikasyen Sarawak, Datuk Seri Julaihi Narawi, pengawa ngubah baru nama ari Sarawak Energy Isthmus Run ninting taun ngagai Sarawak Energy Marathon dikena meri identiti baru ngagai program nya.

“Maraton Sarawak Energy ditumbuh Sarawak Energy Berhad.

Nipak pengawa ngubah baru nama tu, kami mega udah nambah perais mata duit ungkup penyereta.

“Penyampau perais ungkup semua kategori iya nya RM201,500, nambah ari RM185,000 ba taun nyin tadi

“Ba kategori Full Marathon Open, pemenang lelaki enggau indu bela deka nerima perais besai sepenyampau RM15,000,” ku iya ba aum pemberita, ditu ensanus.

Diatur serimbai Hari Mengeri Besai Kuching, program taun tu mandangka empat kategori; maraton penuh 42km, setengan maraton 21km, belanda kompetitif 10km, enggau belanda 5km.

Naka diatu, manggai 500 penyereta udah rejister ungkup kategori maraton penuh, ti deka dilepas pukul 1 pagi ari Menara Sarawak Energy, nengah ikon Kuching nyengkaum Jematan Darul Hana, Begunan Kunsil Nengeri (DUN) Sarawak, Muzium Budaya Borneo, archa mayau Kuching, enggau Kuching Waterfront.

Bala penyereta mega deka nengah palan besai baka Jematan Jambatan Juma’ani enggau Kompleks Satria Pertiwi, nyendia peneleba nyelai sambil mandang pemanah rampa menua mengeri besai tu.

Program nya diatur nengah kerejasama Grit Management, ke alai semua arung dikenuku Association of International Marathons and Distance Races (AIMS), nentuka standard antarabansa dititih.

Sama datai ba aum pemberita, Sekretari Mendam Opis Menteri Utiliti enggau Telekomunikasyen Sarawak, Datuk Jafri Lias, Tuai Pegawai Eksekutif Syarikat SESCO Berhad, Chairman Komiti Maraton Sarawak Energy 2026, Yusri Safri enggau Mandal Presiden Kanan Sarawak Energy Ungkup Servis Korporat, Marconi Madai.

Haribulan rejister kepenudi iya nya 30 June 2026. – EDISI UKAS