SARIKEI: Peranak ari sekeda rumah panjai ba kandang menua Meradong deka ngasai ke perengkaguna pemun ti manah agi pengudah sekeda peminta sida dikemendar perintah.

Nya nyengkaum nyendia tangki ai sereta ngaga enggau nyeruri Rumah Komiti Pemansang enggau Pengelikun Genturung Pendiau (JKKK).

Sapit Menteri Pengawa Bekebun Bedandang Besai enggau Komoditi ti mega Kaban Parlimen Sarikei enggau Kaban Kunsil Nengeri (ADUN) Repok, Datuk Sri Huang Tiong Sii madah, pengawa ngemendar nya sebagi ari pengeransing perintah nyaga pengelantang rayat.

“Aku deka semampai meri perati ngagai tetiap penanggul ti dibantai bala rayat.

“Taja bisi pekara ti begunaka awak diputar, nya tetap deka dikemerat lalu diadu berenggat,” ku iya lebuh ngatur pejalai ngabas seraya gawa ba Meradong, ditu kemari.

Ku Tiong Sii, tetiap penusah ti ditapi rayat seruran diberi perati nitih patut nitih ke pengeransing Gempung Parti Sarawak (GPS) ti ngemeratka peminta mensia mayuh nadai ngira endur.

“Perintah Sarawak seruran ibuh ke pengelantang rayat enggau nentuka tetiap inisiatif ti dipejalai meri penguntung ngagai mensia mayuh.

“Pejalai bemacham projek pemansang besai di Sarikei enggau Bintangor nunjukka pngeran perintah ngubah tikas idup rayat sereta nyamin pengelantang sida,” ku iya.

Ba pejalai ngabas nya, Tiong Sii mega bisi ngabas sekeda projek ti dipejalai nengah Program Transformasyen Menua Pesisir (RTP), nyengkaum projek nyeruri jalai ba sekeda sitak di Kunsil Nengeri (DUN) Repok.

“Berebak enggau nya, sukung belama rayat nyadi peransang ngagai aku terus gawa enggau ngamatka peminta sida,” ku iya.

Bekaul enggau nya, sukung ti seruran diberi rayat nyadika penyungkak semengat ngagai aku ngambi ke terus chakah sereta ransing bejalaika peminta sida,” terang iya.

Sekeda endur ti bisi dilawa iya nya Sungai Mador, Ulu Binatang, Jalan KJD, Sungai Baron, Sungai Kesa enggau Sungai Juah.