MATU: Sekeda peranak menua Pelilih Matu kelebih agi bansa Iban jam ke diatu agi bisi ngetau ungkup sida ti agi ngemeranka pengawa bumai betaun.
Taja pia ba rumah panjai Beruan Besai ditu, sebagi ari sida serumah udah tembu ngetau, diatu sida nguna awak diau ba rumah mupuk nungku padi nyerumba Atur Tagang Pejalai (PKP) ti enda ngemendarka mensia mayuh kelalu jauh mindah.
Ku Tuai Rumah (TR) Gangga Kumbang, kira setengan ari sida serumah udah tembu ngetau lalu kedua udah berengkah nungku padi ke ulih ungkup taun tu.
“Ba menua Matu ditu, kami tebal agi bumai paya dikena ngidupka diri,” ku iya maya dirandau pemberita apin lama ke udah.
Rumah panjai Beruan Besai bisi 23 pintu lalu semina tiga buah rumah aja ke ngentak nyembuah besemak enggau rumah panjai tu.
“Ba pengawa bumai sigi ngayan ke penyerakup bansa ke nguan menua tu laban ke sama betulung enggau pangan diri,” ku iya.
Ku Gangga, pengawa nungku padi dikereja enggau chara beripai enda milih sida ke lelaki tauka indu.
“Nungku padi tu siti ari pengawa dikena ningkil ke igi padi, ketebal agi sida ngindik padi ba atas pelangka,” ku iya.
Nambah ke nya, iya madah padi ke udah ditungku nya deka dipuput tauka diperibut dikena muai ampa sebedau disimpan dalam guni.
Berebak engggau nya iya madah, PKP ke benung dipelajaika diatu nadai tentu ngeruga pengawa bumai betaun ba peranak menua (Matu) nya.
