BINTULU: Raban ke tasah angus di Rumah Jungan Gerang, Batu 36, Jalai Sibu- Selangau terus nerima bantu ari mensia mayuh.
Kemari, Senator Rita Sarimah Patrick Insol udah ngabas enggau nyuaka pemeri RM10,000 ngagai peranak Rumah Jungan.
Pemeri nya dikena mantu ngelempung tating penusah sida ke karam ba darat ti lenyau endur ngenduh enggau pengerugi reta tengkira ba penusah nya.
Ku iya, bantu nya ngelaika iya sinu betatika nasip rayat sereta keran mantu ngelempung tating penusah sida.
Nambahka nya, Rita ngarapka peranak Rumah Jungan sabar nempuh penguji besai tu.
“Sinu endar lebuh ninga berita pasal penusah ke ninggang peranak Rumah Jungan laban lenyau rumah enggau reta tengkira.
“Taja pia, Puji Tuhan laban penusah nya nadai nabanka nyawa,” ku iya.
Ku iya, naka diatu, peranak Rumah Jungan ngenduh ba Gerija St Maria Batu 36 seraya nganti ngaga dampa.
Ba penusah kena 23 Ogos tu tadi, bisi 171 iku peranak Rumah Jungan semina tinggal gari ba punggung pengudah rumah panjai 36 pintu nya angus lengis.
