BETONG: Perintah Gempung Parti Sarawak (GPS) ngemeratka pengawa nguasa Jaku English ngagai bala anak Sarawak ngambika sida ulih besemekih enggau orang bukai.
Adun Layar Gerald Rentap Jabu madah, jaku English badu dikumbai jaku luar agi tang nya jaku ekonomi, teknologi enggau sains.
Nya kebuah ku iya, bala anak meseti nguasa jaku English berindik ari pemesai guna ba dunya ke makin maju diatur setipak enggau juluk Perintah Sarawak.
“Jaku English nya jaku dunya ke mayuh dikena ba pengawa dagang, sains, teknologi enggau digital.
“Enti Sarawak deka ngemansangka modal mensia ti ulih besemekih sereta pintar, bala anak meseti landik bejaku enggau nulis ngena jaku English,” terang iya.
Terang Rentap ti mega Chairman Raban Nembiak GPS, perintah ngemeratka bidang Sains, Teknologi, Injinir enggau Matematik (Stem) ngagai bala nembiak.
Seriris enggau juluk nya, Rentap madahka Perintah GPS udah numbuhka Palan Penyulut Teknikal Sarawak (Centexs) ti nyendiaka mayuh kus nyengkaum teknikal enggau digital.
“Kebuah pia laban Perintah Sarawak nyendiaka mayuh inisiatif lebuh ngemansangka modal mensia ba menua tu.
“Modal mensia ti ngembuan pengelandik enggau penau tau ngasuh sida ulih besemekih ba makit kereja,” terang iya.
