PAKAN: Pengerami Mangkung Tiang Rumah Sara, Nanga Dendang, Ulu Wak ukai semina kelai meri terima kasih tang bukti nyata penemban politik pemansang ti dibai Perintah Sarawak di menua ulu.
Rumah panjai baru 31 pintu ti disikap perengkaguna baka bekal kuasa karan, ai beresi enggau akses jalai semin diintu enggau penuh adat basa kitai Iban.
Menteri Kereja Raya, Datuk Seri Alexander Nanta Linggi madah, perintah nengeri meri agih belanja besai sepenyampau RM1.5 bilion ngagai ejensi pemansang kandang menua baka URDA enggau MIRDA.
Iya madah, nya bukti komitmen Premier Sarawak, Datuk Patinggi Tan Sri Abang Johari Tun Openg kenyau ari taun 2017 dikena ngemansang sebela bagi menua di nengeri tu.
“Politik patut nyadi perengka ngemansang sosioekonomi rayat lalu ukai kelang alai belaya.
“Enti kitai bekerejasama, pemansang menua pesisir deka muntang enggau nemban agi dipejalai,” ku iya.
Nanta bejaku munyi nya rambau bejadi Pengerami Mangkung Tiang Rumah Sara, Nanga Dendang, Ulu Wak.
Ba pengerami nya, iya ngelalau semua raban enda ngira penemu politik begempung nyukung inisiatif perintah nengeri nagih hak Sarawak nengah Sempekat Malaysia 1963 (MA63).
Pia mega, iya bela ngelalau rayat bejimat lebuh bekenaka teknologi pemintar digaga (AI) enggau media sosial berindik ari mayuh berita bula.
Nangkan nya, Nanta meri tabi puji ngagai peranak Rumah Jala laban ulih ngasai ke fasiliti moden baka diatu.
Iya mega meri tabi puji ngagai Sagu Unting ti mujur dichiri nyadi Direktor Kandang Menua URDA lalu nya siti pekara ngemegah ngagai peranak Nanga Dendang.
Bela datai, Kaban Kunsil Nengeri (ADUN) Katibas, Lidam Assan, ADUN Baleh, Nicholas Kudi Jantai enggau Sekretari Politik Menteri Kereja Raya, Datuk Alvin Runggah Jimbun.
