SIBU: Gerempung Pengajar Sarawak (STU) minta perintah besai enggau nengeri ngemanahka agi tikas pengelaju internet seriris enggau atur pengawa deka ngajar nembiak nengah on-line.
Presiden STU Macky Josep madah, sambung internet maya jam diatu beguna bendar ukai semina ba kandang mengeri aja tang nyengkaum di menua pesisir.
“Kitai besetuju penemu ngasuh nembiak belajar di rumah maya timpuh Atur Mindah Betagang (PKP) tu.
“Tang ba menua pesisir, sambung internet nyadi penanggul,” pia ku iya madah nengah penerang media, kemari.
Sebedau tu Menteri Besai Tan Sri Muhyiddin Yassin minta Opis Pelajar bejalaika inisiatif belajar ari rumah tauka ‘home-base learning’ sepemanjai timpuh PKP.
Ku iya madah, chara nya deka digaga nyentuk sekula dibuka baru kelimpah ari ngasaika bala apai indai diatu benung irauka pelajar anak sida.
Muhyiddin ba penerang ke sebaka bela madah, sekula deka dibuka nyema pengerekai COVID-19 ditemu silik punas lalu sekula dipelabaka laun agi dibuka ari pengawa ke bukai.
Nambahka jaku iya, Macky madahka bisi bala pengajar udah dulu agi ngajar nembiak sida nengah online sebedau tu.
“Terima kasih ngagai pengajar kitai ti udah dulu ngajar nembiak nengah online baikka ba whatapps, telegram tauka aplikasyen internet ke bukai,” ku iya.
