KUCHING: Gerempung Kayu Ramu Sarawak (STA) ngarap Perintah Sarawak meri peluang ngagai kaban sida timpuh 12 bulan bejalaika chukai dagang enggau servis (SST) sereta enda ngeletak chukai kemaya hari ti dipejalaika perintah.
Chairman STA, Datuk Henry Lau Kee Kong madah, iya ngarap Perintah Sarawak bejalaika inisiatif ngambi belubah nambah ke tikas chukai ba timpuh dua taun.
Ku iya, pengawa ngeletak ngenyit SST entara satu nyentuk 2.5 peratus ngagai sekeda produk kayu baka ramu geraji, venir, rampang kayu, papan, papan partikel enggau papan lapis lalu diteritka kena 1 April 2023 meri empas ngagai industri kayu ti apin besedia.
“Kaban kami semina nerima penerang ngasuh rejister SST kena 21 March tu tadi taja pen pemutus ngeletak SST udah digaga ba bulan Oktober 2021.
“Pengawa ngeletak chukai baru ngagai sekeda produk kayu meri empas ngagai industri kayu ili.
“Tu nyengkaum nambah ke ungkus pemansut, ngurang ke pengawa besemekih, makit enggau meranak puku kelimpah industri kayu ili majak mit lalu ngujung ke Perintah Sarawak lenyau penatai pemisi,” ku iya nyemetak madah.
Kee Kong nibar jaku nya ba aum pemberita pengudah Aum Besai Ninting Taun STA ba Wisma STA, ditu kemari.
Iya madah, dikena nyukung enggau meransang industri ili, STA bekerejasama enggau Perintah Sarawak ba pengawa ngelakuka industri perengka dalam rumah.
Nya alai ku iya, STA udah meri belanja RM1 juta ngagai Kaunsil Pemansang Industri Kayu Sarawak dikena bejalaika latih pengelandik enggau program nempa modal mensia nyengkaum SayD’signers Sarawak dikena ngemansang ke industri perengka dalam rumah ba Sarawak.
“Industri kayu ili beguna ke puku enggau nentu ke pemeranak puku, tikas pengulih perengka mata besemekih, penegap pengawa landik enggau enda landik sereta kerejasama rat enggau pemekuh makit.
“Pekara ti beguna iya nya polisi meri peransang enggau sukung rat entara Sarawak enggau Perintah Besai,” ku iya.
Ngelansa senentang pengawa ngambi pengereja pengawa ari menua luar, Henry madah, STA ngarap perintah ngerumban pengawa ngambi raban nya ukai semina ari Indonesia tang ari menua bukai baka Bangladesh, Nepal enggau Myanmar.
“Polisi Sarawak ti semina ngambi pengereja pengawa ari Indonesia nyungkak ngagai isu suntuk pengereja pengawa kasar.
“Pekara tu enti enda diputar lengkas ulih ngeruga nama manah Sarawak ba pekara eksport ti meruan enggau betampung.
“Isu tu enggau isu bukai ti ditapi industri bukai udah dibantai ngagai Sapit Menteri ba Opis Premier Sarawak (Pengereja Pengawa Kasar, Imigresyen enggau Pengawa Matau Projek), Datuk Gerawat Gala ba Sesyen Randau ba bulan April 2022,” ku iya.
