GEREMPUNG Pemansang enggau Main Asal Asar Pinyawa (PKKAP) mujur ngatur Brumbiak Pinyawa 2026 enggau richah sereta nerima timbal chukup manah ari komuniti dia.
Pengerami nya ngempuru urung 600 penyereta ari 14 genturung pendiau ba sitak Pinyawa ti ngambi bagi ba pengawa bejalai beraban penyauh 1.9 kilometer, belabuh ari Balai Mayuhguna Kampung Serumah lalu tembu di Balai Mayuhguna Kampung Gayu.
Entara genturung pendiau ti ngambi bagi iya nya Gayu, Serumah, Begu, Pesang, Subang, Krian, Sira, Peraya, Stabut, Chupak, Plaman Payang, Skuduk, Sungai Rise enggau Maang, ke alai semua kampung tu entara sitak ari baruh Pinyawa.
Brumbiak Pinyawa 2026 nyadi kelai penyerakup komuniti sereta ngayanka pengerindu ngagai pesaka budaya ti ditampung ari aki ini kitai kelia.
Pengerami nya mega richah enggau bemacham pemerindang main asal, pekayan asal, muzik etnik sereta aktiviti ngaul komuniti ti ngayanka penyelai identiti komuniti Bidayuh Pinyawa.
Nyadi pengerami ti mandangka kelai terima kasih pengudah musin ngetau, Gawai Dayak ngembuan besai tuju enggau reti negut kaul penyerakup sereta semangat begulai ba raban bansa Dayak di Sarawak.
Nengah pengerami Brumbiak Pinyawa 2026, pesaka budaya ti dikemegah komuniti menua mujur disagu ngagai rebak biak seraya dipandang ngagai bala pengusung ti bisi datai.
Pengerami tu ukai semina nyadi pelasar ngetan enggau nyagu adat sereta main asal, tang mega mujur ngerapitka kaul entara komuniti Pinyawa.
Semengat kerejasama ti dipandang peranak menua sepanjai pengerami nya mega mandangka pengeransing komuniti dikena nentuka pesaka budaya meruan dijaga lalu ditampung ngagai rebak dudi.
Tambah mega, pengerami tu mujur matak penatai temuai ari endur bukai kelimpah ari peranak dia empu.
Penatai bala bukai tu mandangka pengeran sereta meri peluang ngagai sida meda kediri penyelai budaya komuniti Bidayuh Pinyawa.
Penatai sida nyaup ngelaku main asal menua tu ngagai mensia mayuh seraya nyukung pemansang industri dagang temuai bepelasarka budaya ba endur nya.
Nya alai, Brumbiak Pinyawa 2026 mujur nyapai juluk nyadi pelasar nemban dikena ngerapitka semengat penyerakup, ngerembai ke pesaka budaya sereta nempa identiti raban bansa Bidayuh.
Pemujur pengerami tu mega mandangka adat enggau main asal mengkang relevansereta diterima mensia mayuh ba jeman moden.
