KAPIT: Petroliam Nasional Berhad (PETRONAS) udah nyuaka pemeri kereban pemun perubat ngagai Klinik Pengerai (KK) Kapit ti beungkus lebih RM50,000 dikena nyukung guna ninting hari enggau operasyen klinik nya.
Kaban Parlimen Kapit, Datuk Seri Alexander Nanta Linggi madah, entara perengka perubat enggau ukai perubat ke diberi iya nya pam picagari, kereban matau seput, kerusi roda standard, bangku enggau dispenser ai.
Nambahka nya, iya mega madah ke program ti diatur nya ngembuan tuju deka ngemanah perengkaguna pengerai ti bisi diatu nengah chara meri perengkaguna pemun perubat ngagai 26 buah KK menua pesisir di serata Sarawak nengah agih belanja RM1.3 juta asil ari kerejasama begulai Gerempung Bini Bala Menteri Sarawak (SABATI).
“Pengerai nyadi reta pemadu berega dalam pengidup kitai lalu nyadi pelasar pengelantang diri enggau komuniti.
“Nya alai, Petronas enggau SABATI ngatur program ti efektif iya nya nyendiaka perengkaguna pengerai ti bekualiti sereta muntang dilawa ngagai komuniti menua pesisir di Sarawak,” ku iya lebuh bejaku ba Program Discover Petronas@School (DPS) (Outreach) di Kapit ditu, ensanus.
Menteri Kereja Raya nya mega temegah ati meda pengawa Petronas ti udah bebendar matak pengerindu nembiak dalam Sains, Teknologi, Injinir enggau Matematik (STEM) nengah program nya.
“Pengawa baka tu beguna amat laban STEM ulih meri empas manah dalam nempa raban bansa ti ngembuan literasyen STEM ti bepengelandik tinggi sereta ulih meri pangka ngagai inovasyen baru.
“Inisiatif tu mega setipak enggau Langgur Pemansang Pelajar Malaysia (PPPM) 2013-2025 ti ngemeratka STEM ba renggat sekula nengah kurikulum nyengkaum aktiviti kokurikulum,” ku iya. – ARIANA FIDELIA
