KUCHING: Ubah Rang Undang-Undang (RUU) Ordinan Pemagi Gas (Ubah) 2023 udah dikemendarka pengudah dipejurai sereta disukung 16 Kaban Kunsil Nengeri (ADUN).
Menteri Utiliti Enggau Telekomunikesyen Datuk Seri Julaihi Narawi madahka ubah RUU nya deka meri kuasa ngagai Kaunsil Aum Perintah Nengeri nyiri ‘Gas Aggregator’.
“Ubah RUU deka nentuka gas seruran bisi ungkup industri enggau penguna seraya negapka, ngemanah sereta ngerembaika industri gas ti udah bisi dalam rintai enggau sistem idar menua.
“Dipelabaka Petroleum Sarawak Berhad (PETROS), sebuah serikat diempu Perintah Sarawak ngembuan peneleba enggau penemu dalam pengawa ngidar gas deka dichiri nyadi ‘Gas Aggregator’ nya lebuh RUU tu udah dikemendar,” ku iya.
Julaihi bejaku munyi nya lebuh bantai RUU Ordinan Pemagi Gas (Ubah) 2023 ba bacha ti kedua enggau ketiga Aum Kedua Bagi Penggal Kedua DUN Sarawak ti Ke-19, ditu tadi.
Ku iya, naka diatu, PETROS udah bisi lisin ngidar Gas Petroleum Pelai (LPG) di Sarawak lalu deka dichiri nyadi pengidar tunggal LPG berengkah 1 Disember 2023,” ku iya.
