PENELEBA pekebun di India ti mega entara pengeluar kunyit pemadu besai dunya nunjukka pemujur utai tanam nya ukai bepanggai ba pengawa ngena mayuh sum aja. Tang, sida chukup ngemerat pengawa nyendia tanah ti ami, ngena bahan organik ti chukup, sistem ai ti manah sereta milih paung bekualiti.

Kebendar, prinsip ti sama ulih dikena pekebun mit di Malaysia. MAYUH orang milih nanam kunyit laban utai tanam tu nyamai ditanam enggau intu.

Ba genturung pendiau tauka mengeri, kunyit suah ditanam ba tisi rumah, dalam polibeg tauka ba kebun mit ngambi dikena ninting hari.

Daun ti galak bechura gadung ukai semina ngemanah kandang rumah tang mega ulih dikena ba bemacham resepi pemakai.

Tang ari pun utai tanam ti gadung enggau merundai, mayuh pekebun napi siti penanggul iya nya bulih kunyit ti enda besai baka ti dikedeka. Suah kitai bulih asil ti enda sebela, bisi ke mit, mipis, kelalu alus lalu bisi ti nyau udah lalu ketegal tanah ti enda engkeman.

Pekara tu mandangka pengawa nanam kunyit, pemujur kebendar ukai bepanggai ba daun ti galak tang mega ba gaya paung ti tumbuh manah dalam tanah.

Paung tu ti berega laban suah dikena nyadi rempah, bahan perubat asal, chura asal enggau bahan mata ba industri pemakai sereta kosmetik. Nya kebuah, paung nya majak tumbuh dalam tanah lalu kitai enda ulih meda pemesai paung nya.

Nya ngujungka mayuh orang salah lebuh ngumbai daun ti besai enggau tinggi deka mansutka mayuh asil.

Tang kebendar, paung nya ulih ngasilka daun ti besai asil nutrien disimpan ari benih tang paung baru dalam tanah enda ulih mansang besai ketegal penanggul urat, tanah tauka ke bukai.

Siti ari pekara ti patut dikemerat maya nanam kunyit iya nya milih endur enggau bansa tanah. Kunyit begunaka tanah ti ami enggau bisi sistem entali ai ti menyana

. Tanah ti kelalu dedat deka ngasuh urat pedis mansang seraya tanah ti suah ngandang ai deka ngujungka urat kurang oksigen.

Nya kebuah, pengawa nyendia tanah patut dikemerat. Sebedau betanam, tanah meseti digaga bakut dulu lalu ditambah ngena bahan organik baka sum organik.

Enti endur nanam kunyit suah ngandang ai maya ujan, pengawa ngaga bakut ti tinggi agi endang patut ngambi enda ngandang ai agi.

Kunyit mega deka idup galak agi enti ngena tanah, kompos enggau tanah masak.

Kelimpah ari tanah, pengawa milih benih mega beguna endar. Paung nya meseti dipilih manah laban enti paung nya enda manah deka ngasuh lubah mansang enggau mansutka asil ti enda mayuh.

Tambah mega, enti nanam paung kunyit, anang nanam kelalu semak laban urat deka mansang besai dalam tanah ngambi mansutka asil ti manah.

Nyema ditanam kelalu semak entara paung kunyit bukai deka ngasuh paung nya enda chukup nutrien enggau ai. Takah paung kunyit ti engkeman ditanam urung 30 nyentuk 45 sentimeter ngambi ulih mansang besai.

Kunyit semina begunaka tanah ti embap, ukai nya tanah ti semampai basah.

Maya musin kemarau, kunyit nya meseti disimbur ai belama lebuh tanah nyau majak rangkai.

Pekebun ti mujur enda bepanggai ba taga aja tang mega pengawa meresa dulu tanah sebedau nyimbur ai.

Pengawa tu ulih nyeliah urat kelalu lama basah ngujungka paung nya luluh.

Pengawa ngesum mega patut disukat manah. Maya baru nanam kunyit, utai tanam tu begunaka tanah ti ami enggau urat ti manah dibanding sum kimia ti mayuh.

Sum organik tauka kompos ulih diberi maya nyendia tanah dikena nambah penyampau bahan organik. Pengudah paung kunyit mansang besai, pengawa ngesum dipejalai berenggat ngambi kunyit enda nerima kelalu mayuh sum ngelui ari tatak.

Pengudah ngarang kunyit, asil nya ulih dibagi nitih guna laban bisi nya ulih dijual terus tauka diinjin nyadi repu kunyit enggau bemacham produk tambah bukai.

Peneleba pekebun di India ti mega entara pengeluar kunyit pemadu besai dunya nunjukka pemujur utai tanam nya ukai bepanggai ba pengawa ngena mayuh sum aja. Tang, sida chukup ngemerat pengawa nyendia tanah ti ami, ngena bahan organik ti chukup, sistem ai ti manah sereta milih paung bekualiti.

Kebendar, prinsip ti sama ulih dikena pekebun mit di Malaysia.

Nya alai, pengawa betanamka kunyit ukai semina deka bulih mayuh asil tang mega begunaka pengawa mereti utai tanam nya.

Pemujur kebendar bepun ari dalam tanah nengah urat ti manah, tanah ti ami enggau ngatur ai ti pintar sereta pengawa ngesum ti sebela.