SARATOK: Pangku pengawa Gerempung Apai Indai enggau Pengajar (PIBG) ukai semina ngelangkar enggau ngatur aktiviti ba sekula aja tang lebih ari nya.
Sapit Menteri Pengeluar Kuasa enggau Pengeraja Asal, Ali Biju madah, PIBG menggi tanggungpengawa besai ngemujurka semua pengawa ngaul pekara pengelantang enggau pemansang nembiak sekula nya.
Ambika chunto ku iya, kerejasama rat entara piak sekula enggau PIBG deka nentuka semua pejalai pengawa enggau aktiviti ngaul pelajar lanchar enggau nyapai juluk.
“Ari nya, aku andal amat PIBG meretika pangku pengawa diri enggau bejalaika tanggungpengawa nitihka pematut ngambi pengawa gerah mudah dipejalai.
“Kitai diatu begunaka kerejasama ari semua piak ba timpuh Atur Tagang Pejalai Penyuman (PKPP) berindik ari sekula dibuka baru lalu mayuh Atur Standard Pengawa (SOP) ditetapka perintah dikena nyaga pengelikun enggau pengerai semua,” ku iya.
Jaku Ali dikenataika nengah pengari iya, Pengajar Baraw Umak ba pengawa nyuaka chek geran Projek Mit Pemansang Menua Pesisir (MRP) penyampau RM5,000 ngagai PIBG Sekula Primari (SK) Temudok, Awik ti diterima Kepala Pengajar Fadreen Jingan, pagi kemari.
“Piak PIBG mega ulih mantu piak sekula matau pejalai nembiak ke pulai hari nentuka sida nya nitihka SOP kelimpah meri kerejasama enti sema piak sekula begunaka bantu ari sida.
“Kitai deka nerenak pemereti ati enggau kaul kerejasama entara semua piak ngambika nyaup perintah ngemutarka penusah besai tu lalu ngarapka iya teputar jampat.
“Seagi igi penyakit tu apin pukas, kitai anang enda semampai bejagaka pengelikun enggau pengerai diri, titihka mih SOP enggau pendingka gerah ari piak bekuasa,” lalau Ali.
