PKPB pemutus berat tang patut dititih – DTTAS

KUCHING: Pemutus neritka Atur Mindah Betagang Belebas (PKPB) patut diterima taja berat dikena munaska pengerekai penyakit Covid-19.
Mandal Presiden ll Gerempung Pemikir Dayak Sarawak (DTTAS) Diana David Itang madahka taja pemutus tu berat diterima rayat tang nya chara ti pemadu engkeman munaska penyakit nya di menua tu.
“Pemutus tu patut diterima enggau ati tebuka sereta positif.
“Sebedau nentuka pemutus PKPB tu, udah tentu Opis Menteri Pengerai Malaysia (KKM) enggau Kaunsil Pengelikun Menua (MKN) ngerunding semua sukut sereta pangka ngagai mensia mayuh,” ku iya dalam siti penerang media, kemari.
Ku iya, PKPB tu deka meri ruang ngagai perintah ngelaban pengerekai penyakit nya ngagai tikas ti meruan agi kelimpah muka sektor ekonomi berenggat.

Diana David Itang.

“Pemar ti ditapi rayat empas ari PKPB tu endang balat tang kitai mesti nyaga pengelikun dulu.
“Tambah mega, ‘munsuh’ ti dilaban kitai tu enda ulih dipeda lalu tau ngujungka pemati,” ku iya.
Iya sekali agi ngelalau, semua rayat ngembuan tanggungpengawa dalam nagang pengerekai Covid-19.
Nangkan nya, Ketuai Pekara Seni enggau Main Asal DTTAS Malvina Albert Klinsing meransang raban bekaul enggau servis pemadu beguna (essential servis) negapka pekara pengelikun ti lebih meruan.
“Sida patut nyendiaka perengka meresa pengangat isi, lalu enti sema pengangat isi orang nya lebih ari ti patut sida mesti ngangauka Opis Pengerai tauka raban sepital besemak.
“Penuchi jari patut disediaka ba mua pintu enggau palan ke patut dikena nyeliahka pengerekai virus Covid-19 kelimpah nyaga takah entara pangan diri.
“Kitai ngarapka atur ti lebih terit diambi raban bekuasa ngagai orang ti ngelanggar atur maya timpuh PKPB laban bisi sekeda orang enda ngambi serius isu Covid-19,” ku iya.
Tandu iya, semua orang mesti meri kerejasama ngagai KKM baikka dalam sukut ekonomi, politik enggau kaul rama ngelaban pengerekai penyakit nya.
Ensana, Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka enam pelilih menua deka dikenaka PKPB berengkah 13 nyentukka 26 Januari tu.
Enam pelilih menua tu iya nya Kuching, Samarahan, Serian, Sibu, Sarikei enggau Miri.
Malvina Albert Klinsing.