KUALA LUMPUR: Rang UndangUndang (RUU) Konstitusyen (Ubah) 2026 dikena natak timpuh pangku pengawa Menteri Besai ngagai 10 taun dibantai nengah bacha keterubah ba Dewan Rakyat, ditu ensanus.
RUU nya dibantai Menteri ba Opis Menteri Besai (UndangUndang enggau Reformasyen Institusyen), Datuk Seri Azalina Othman Said ti madah ke bacha kedua kali disadang diatur minggu baru.
Ku iya baru, ex-Menteri Besai ti bisi rikod servis pengelama 10 taun enda tau dichiri baru mangku pengawa nya nyema RUU bekaul natak timpuh pangku pengawa Menteri Besai dikemendar Dewan Rakyat enggau diterit ila.
Azalina madah ke RUU nya netapka taun servis ungkup sapa-sapa Menteri Besai lalu ukai ditetapka bepelasarka timpuh penggal Parlimen.
“Sapa deka nyadi Menteri Besai (udah tu), iya enda tau lebih ari 10 taun. Nya kebuah, pekara ti digaga ba ubah konstitusyen tu, iya mega berati ke taun iya udah gawa nyadi Menteri Besai.
“Reti iya, tu dikira ke belakang (rikod ti dulu).
Nya kebuah, Menteri Besai ti bisi diatu, ambi ke chunto PMX (Datuk Seri Anwar Ibrahim), iya menang baru ba Pengawa Bepilih Besai (PRU) Ke-16, iya deka nyadi Menteri Besai sekali da, ulih.
“Tang, enti dikira ari taun, iya tinggal tujuh taun da, ukai deka meri iya 10 taun da, ukai.
Engka Tan Sri Muhyiddin (Yasin), enti nyadi Menteri Besai sekali da laban iya menang, bisi lapan taun da lalu Datuk Seri Ismail Sabri Yaakob engka tinggal semilan taun da,” ku iya.
Azalina madah munyi nya pengudah taklimat bekaul RUU melara pangku pengawa Luyar Menua enggau Pedawa Raya sereta natak timpuh pangku pengawa Menteri Besai ba Dewan Bankuet Parlimen ditu, ensanus.
Taklimat nya mega digulu Kaban Parlimen ari blok perintah enggau penyakal.
Ngenang silik, Azalina madah, ubah diadu ngambi ngamat semaya manifesto PRU ti dulu lalu enti dudi hari deka ngena chara diatu, nya tepulai ngagai perintah udah tu.
“Konstitusyen ulih diubah. Perintah udah tu ti bisi majoriti dua pertiga ulih ngubah undangundang.
Tambah mega, timpuh pangku pengawa mega ulih diubah baru lalu sida ulih ngadu enti deka Menteri Besai ke diatu meruan mangku pengawa nya.
“Enti kita bisi undi sukung dua pertiga tauka lebih ba Parlimen, kita ulih ngereja nama-nama aja bekaul Konstitusyen.
Utai ti dikereja, perintah tu begulai enggau bakih gempung benung ngamatka semaya ngagai rayat dalam manifesto PRU Ke-15 ti dulu.
“Ba manifesto, bisi parti merambu dua penggal, bisi parti ti merambu sepuluh taun.
Kebendar, perintah benung ngamatka utai ti udah disemaya tauka bisi dalam manifesto.
“Tang, perintah udah tu enggau majoriti baru agi ulih ngubah nya.
Nya endang prerogatif sida,” ku iya.
Ba taklimat nya, Azalina madah ke ubah RUU nya semina ngaul pangku pengawa Menteri Besai nya, enda negu tauka bisi besangkut-paut enggau pangku pengawa Kepala Menteri enggau Menteri Besai laban nya atur ngaul nengeri.
