PAKAN: Gerempung Pemansang Nembiak Rebak Baru Pakan enggau Julau (PNRB) bisi ngatur Program Insentif Nembiak Nyulut ungkup Setipikit Pelajar Malaysia (SPM) 2020 ngagai peranak menua nya.
Chairman PNRB,Tedong Chakaw madahka program tu dibagi ngagai dua kategori A enggau B, iya nya kategori A tu nembiak ti bulih pemutus 5A ke atas deka nerima insentif mata duit enggau setipikit.
“Udah nya, kategori B ungkup nembiak ti bulih nyambung pelajar ngagai Palan Pelajar Tinggi (IPT) lalu timpuh nganjung peminta abis laun kena 31 Ogos.
“Semua nembiak ke udah nyulut diperansang nganjung peminta diri sekalika ari sepiak apai tauka indai sida endang asal ari menua tu,”ku iya.
Ba penerang berita ti sama, Tuai Program Jimmy Manju madah program tu asil kerejasama PNRB enggau dua serikat iya nya AJ Trully Spices Enterprise enggau EverSpring Resources Sdn Berhad.
“Tu terubah iya, PNRB bejalaika program meri insentif ngagai nembiak ti bulih pemutus peresa manah begulai enggau serikat dagang.
“Nya alai, arapka pengawa manah baka tu terus dipejalai maya dudi ke pemaik peranak Pakan,”ku iya madah ngagai Ruai, Suara Sarawak.
Pia mega Jimmy, meri terima kasih ngagai semua kaban gerempung ti nadai ngira rugi tau pedis ketegal deka nyukung pemujur gerempung tu.
“Terima kasih ngagai pengiruh kaban PNRB baka Tukang Wang, Sylvia Thomas Galang, Penulung Tuai Program Anita Ujon enggau Telenyie Anthony.
“Tu mih siti chunto ti manah, laban ari ati ti lurus lebuh ngereja pengawa. Arapka pengawa kita tu deka teulih asil ti manah jemah,” ku iya.
Kelimpah ari nya, arapka program tu nyadi chunto NGO bukai ke pemaik pemansang raban nembiak rebak baru,” ku iya.
