KUCHING: Siku pondan dipelaba mabuk udah mechahka chermin pintu belakang sebuah Ambulans kelimpah nyerang siku staf perubat enda jauh ari Bank CIMB di Satok, kemari.
Ketuai Polis Pelilih Kuching Asisten Komisioner Awang Din Awang Gani ngenuku pekara nya nyadi maya Ambulans nya ba rantau jalai deka ke Batu Lintang urung pukul 6.20 petang.
Kenu ku iya, saspek ke mega peranak menua tu beumur 19 taun nya enda memukai entepaka diri ba puak jalai besai ngujungka deriba Ambulans ngetu.
“Nitih ripot saspek enda memukai mechahka cheremin belakang entukar nya lalu manjung enda temu kebuah.
“Tudah ke nguji ngumbuk iya ngagai tisi jalai nyau dilaban nyentukka baju Kereban Penyaga Diri (PPE) ke dikena tudah nyau charik,” ku iya nengah sebengkah penerang tadi.
Tandu iya, bekau ari nya pondan enggau orang ke ngumbuk tadi nyau bibat ngujungka siku ari seduai bisi bakal, saspek udah nya ngelarika diri.
Iya madah, orang ke nguji ngumbuk pondan tu iya nya gawa nyadi derisa beumur 33 taun begulai enggau siku deriba Ambulans sereta siku indu misi.
Berindik ari nya, ku iya saspek mujur ditangkap ba sebengkah jalai mit di Satok urung pukul 10.30 malam.
Ku iya, saspek diatu udah diriman lalu kes agi dipansik nitihka Seksyen 323/427/186 Kanun Keseksaan.
