KUCHING: Tiga penyandang Dun ari Parti Pesaka Bumiputera Bersatu (PBB) Dun Stakan, Dato Sri Mohamad Ali Mahmud, Dun Kalaka Datuk Abdul Wahab Aziz enggau Dun Tebedu Datuk Amar Michael Manyin Jawong ditukuka nadai ngetanka penuduk sida maya Pengawa Bepilih Nengeri Ke-12 (PRN-12) kena 18 Disember tu.
Nama ketetiga pengari rayat veteran ari PBB nya ti disebut Chairman Gempung Parti Sarawak (GPS) Datuk Patinggi Tan Sri Abang Johari Tun Openg lebuh bejadika Pengawa Ngelancharka Tim GPS ba Indu Opis Parti Pesaka Bumiputera Bersatu (PBB), malam tadi.
Ku Abang Johari ke mega Presiden PBB, Ali Mahmud, Abdul Wahab enggau Manyin nyurutka diri laban deka meri peluang ngagai orang baru enggau orang biak bediri minta pilih.
“Mayuh agi ti deka meri peluang ngagai orang baru laban nya endang udah adat kitai… aku mega deka meri selamat jalai dudi hari ila,” ku Abang Johari.
Nya kebuah, iya meri terima kasih enggau ngenang semangat ketetiga tuai nya lebuh mai ubah ngagai parti GPS seriris enggau pemansang kemaya hari ti dekaka rebak baru.
“Gaya dunya udah berubah lalu kitai begunaka rebak baru ngambi mai Sarawak nyadi menua maju manggai taun 2030,” terang Abang Johari.
